Полимерден материаллагъа сурам ёсе барады

Къабарты-Малкъар къырал университетни «Эльбрус»  инжиниринг арасы бла Санкт-Петербургну   къырал университети (СПбГУ) бир къауум айны байламлыкъда ишлеп жангы полимер композиция материалла къурагъандыла.   Ол алюминден иги да кёпге,   къурчдан   эки кереге къатыды. Аны бла бирге биринчисинден 1,5 эм башхасындан а 4,5 чакълы бирге  женгилди.

СПбГУ-ну къыйматлы проектле  жаны бла проректору, «Жангы производство технологияла» араны  таматасы Алексей Боровков айтханнга кёре, ала къысха заманда КъМКъУ бла бирге  рынокда аслам  сурам болгъан  полимер композит материалла чыгъаргъандыла. Ол санда цифралы модельлери да жарашдырылгъанды. Бюгюнлюкде цифралы промышленность айныгъан кезиуде химиклеге, технологлагъа эм конструкторлагъа да аны уллу  магъанасы барды. Ол  жаш алимлеге  аддитив технологияла, жангы разработкала, цифралы  проектирование  жаны бла   халкъла аралы даражагъа чыгъаргъа  эм предприятияланы арасында да   байламлыкъны айнытыргъа да  болушурукъду.

 Полимер композит материалланы жарашдырыуда уллу температурала чыдагъан термопластла эм жарылмазча эпоксид чайырла   хайырланыладыла.   Бюгюнлюкде ала  авиоция, космос, медицина, автомашина ишлеуде  эм башха производствода да  кенг хайырланадыла. Келир заманда бютюн жетишимли къармашырча    илму школланы бирикдирирге  консорциумла къураргъа керекди. Ол шарт «Илму» миллет проектни жашауда бардырыугъа да  ахшы себеплик этерикди.

- Бюгюнлюкде Росейде илмуну айнытыугъа хар жерде да бирча эс бурулмайды.  Эрттеден бери илму араланы кёбюсю къыралны Ара эм Сибирь федерал округларында   орналадыла. Аны бла бирге уллу мегаполиследе бла регионлада алимлени онгларын да тенглешдирирча тюйюлдю. Къыйматлы проектлени кёбюсюне эс бурулмай къаладыла.  Ол себепден бизни консорциумну борчу  жаш алимлеге  тинтиу ишлерин бардырыргъа эм  кеслерин ачыкъларгъа болушургъады, дейди КъМКъУ-ну илму-излем жаны бла проректору, «Эльбрус» инжиниринг араны таматасы Светланы Хаширова.