14 октябрь - Стандартизацияны халкъла аралы кюню

Кёзге артыкъ кёрюнмегенликге, магъанасы  уллуду

Жыл сайын онтёртюнчю октябрьде  битеу дунияда да  Стандартизацияны халкъла аралы кюнюн белгилейдиле. Бу дата бирикген стандартланы  магъаналылыкъларына адамла эс бурур аны бла бирге быллай иш бла кюрешген специалистлени усталыкъларын белгилер ючюн къуралгъанды.

Бу байрамны къуралыу тарыхыны юсюнден айтханда, 1946 жылда  14 октябрьде Лондонда стандартизация жаны бла ишлеген миллет организацияланы конференциясы ачылгъан эди. Жыйырма беш къыралдан, ол санда Совет Союздан да,  65 делегат къатышханды анга. Конференцияны ахырында стандартизация жаны бла халкъла аралы организация (ИСО) къураргъа оноу этилгенди.

Стандартизацияны баш магъанасы -  къайсы ишде да анга къатышханланы хар бирине да тап келген, къоркъуусузлукъну, аяулукъну излемлерин да эсге алып алай жарашдырылгъан жорукъланы жарашдырыуду. Сёз мында илмуда, техникада, промышленностьда, эл мюлкде, къурулушда, транспортда, маданиятда, саулукъ сакълауда, сатыу-алыуда эмда кёп башха сфералада энчи бир продукцияны, мардаланы, амалланы, сёзлени, белгилени юслеринден барыргъа боллукъду.

Къайсы производствону да айнытыу атламлары кёбюсюнде стандартизациягъа кёре боладыла. Илмуну, техниканы, жашауда сынамны эм жангы жетишимлерине таянып ол бу сфераланы алгъа тюртген кючледен бириди. Къабарты-Малкъарда бу жумушланы « Стандартизацияны, метрологияны эм сынамланы къырал регион арасы» федерал бюджет учреждение жалчытады. Анда айтханларыча, быйыл бу байрам  «Стандартла эмда  инсанла. Жамауатха таплыкъгъа» деген чакъырыу бла белгиленеди.

Стандартла COVID-19 аурууну жайылыууна къажау кюреш бардырыргъа да  болушадыла, дейдиле ведомствода. Битеу дунияда стандартизация жаны бла специалистле жамауатны саулугъун, къоркъуусузлугъун сакълар эмда инфраструктурагъа себеплик этер хыйсап бла бек уллу къармашыудадыла. Коронавирусдан вакцинаны къураугъа эмда лабораториялада аны сынам халда хайырланып кёрюуге  Стандартизация жаны бла халкъла аралы организацияда эмда Халкъла аралы электротехника комиссияда бийик магъана бередиле. Сёз ючюн, жангыртылгъан ИСО 22367:2020 стандартны хайыры бла лабораториялада  жангылычланы  азайтыргъа къолдан келликди. Бу документде медицина тинтиуле бла байламлы рекомендацияла бардыла.

Росстандарт да пандемияны кезиуюнде къармашхан организациялагъа ишни къоркъуусуз  бардырыуну  жорукъларын  жарашдырыргъа чакъырады. Анда коллективде вирус жайылмазча  мадарла кёргюзтюлюрге керекдиле.