Оптика связьны сайлагъанланы саны кёбейе барады

«Ростелеком» Къабарты-Малкъарда берген Интернет связьны  хайырланыучуланы саны бу кюнледе 80 мингнге жетгенди. Аладан 60 процентине бу жумуш оптика ызла бла бериледи, дегендиле компанияда.

Сексенмингинчи абонент Замира Арамисовады, ол Лескен районда Аргуданда жашайды. Айтханыча, энди аны юйюнде Интернет бек тынгылы эмда терк ишлейди. Алгъын кезиуледе ол жетишмей тургъан эсе, шёндю юйдегилерини хар бирине да сюйгенича аллай бир жетеди. Компанияны Wink сервисини хайыры бла сабийле телевизорда мультфильмлеге, таматала уа кинолагъа къарайдыла. Аланы качествосуна да сёз айтырча тюйюлдю.

Оптика связьны айнытыугъа «Ростелекомда» бек уллу магъана бериледи. Аны тийишли инвестициялы программасыны чеклеринде республикада быллай ызланы узунлугъу 8,5 минг километрге жетгенди, абонентлени санына уа быйыл беш мингден артыкъ адам къошулгъанды.

«Оптика сетьни хайыры бла абонентлеге кёп тюрлю цифралы сервис берирге онг барды. Быллай Интернетге 80 минг адам къошулгъаны къууандырады, адамла бизге ышаннганларын кёргюзтеди», - дегенди компанияны КъМР-де бёлюмюню башчысыны орунбасары Дмитрий Шеметов.

Тарифлени, сервислени, Интернетге къошулуу амалланы юсюнден «Ростелекомну» бёлюмлеринде, сайтында неда 8 800 100 0 800 номер бла сёлешип билирге боллукъду.