Сансызлыкъны ахыры – жарсыу

Ма энтта да юйлени жылытыр кезиу жетгенди. Насыпха, Къабарты-Малкъарны шахарларыны бла эллерини барысы да газ бла жалчытылыннгандыла.  Алай отун неда кёмюр печьлени, тюрлю-тюрлю приборланы хайырланнганла да бардыла. Ала къоркъуусузлукъну жорукъларын сансыз этедиле. Аны ахыры уа аман бла бошалады: от тюшюп, кёпле ачыйдыла, мюлклерин тас этедиле.

КъМР-де От тюшюуге къажау къырал службада къуллукъ этгенле дайым да сакълыкъгъа чакъырадыла, жылытыучу приборланы сатып алырдан алгъа аланы юйледе хайырланыргъа жарагъанын бла къалгъанын билирге кереклисин эсгертедиле. Дагъыда инструкцияны окъуп, анда жазылгъан жорукъланы толтурургъа тийишли болгъанына тюшюндюрюрге кюрешедиле. Уллу кёллюлюк къаллай хатагъа келтиргенине юлгюле да келтиредиле.

Сёз ючюн, районларыбыздан биринде бир тиширыу юйюн жылытыр муратда темир печьни токга къошханды. Сора аны ёчюлтмей, тюкеннге кетгенди. Бир кесекден а сабийи школдан келеди да, тютюнню кёрюп, къоншуларына чабады. Алай а от терк окъуна жайылып, юйню башына жетгенди. От ёчюлтюучюлеге бу хапар кеч жетгени ючюн, ала болушлукъ эталмагъандыла.

Газ печьлени юслеринден айтханда уа, къыш узуну алагъа сакъ болгъанлай, къалай ишлегенлерин тинтгенлей турургъа тийишлиди, деп эсгертедиле от ёчюлтюучюле. Юйлени жылытыу башланнган кезиуге от жагъаны, быргъыланы къурумдан, кир-кипчикден ариуларгъа, алада хауа жюрюгенин бла къалгъанын билирге керекди.

Юйде газ ийис чыкъса, терк окъуна битеу приборланы ёчюлтюрге, терезелени, эшиклени ачып, отоуда хауаны тазаларгъа тийишлиди. Ол кезиуде сирнек къабындырыргъа неда чыракъны жандырыргъа арталлыда жарамайды.

Мекямгъа от тюшген эсе уа, мычымай энчи службагъа мобиль телефондан «112», стационардан а «01» номерлеге сёлешип, болушлукъ излегиз. Алада къуллукъ этгенле жетгинчи уа отну ёчюлтюп башларгъа да боллукъду. Аллай онг жокъ эсе уа, терк окъуна юйден эшикге чыгъып, алай сакълагъыз болушлукъну.