Яслилени санына танг къошулады

Къабарты-Малкъарда сабийлени школгъа дери билим бериу учреждениялада жерле бла жалчытырча аслам эс бурулады,  ол санда Чегем районда да.  Анга кёре  Мир, Шалушка эм Звёздный  элледе да  180 сабийге ясли блокла ишлене турадыла, деп билдириледи муниципалитетни администрациясыны  пресс-службасындан.

Проектге кёре, ясли блокла бир этажлы боллукъдула. Бюгюнлюкде Мир бла Шалушкада  жети группагъа  жерле къуралгъандыла, аланы хар бирине  жыйырмашар сабий жюрюрюкдю. Звёздныйде да 40 гитчеге ясли бите турады. Аны уллулугъу 500 квадрат метрге жетеди, бюгюнлюкде аны  бышын  жабып  бошай турадыла.

Блокланы  кеслерини жукъларча отоулары, кийимлерин алышхан бёлюмлери, къургъакъсытыучу шкафлары, ашханалары, медицина, методика пунктлары, музыкадан бла спортдан жараула бардырырча  заллары, хамамлары эм аберилени  сакъларча жерлери, «ТКУ-600» - котельнялары,  КТП-2х160кВа - трансформатор подстанциялары  эм  дизель-генераторлары да боллукъду.     

Бюгюнлюкде подряд организацияла объектлеге   жылыу берген эм кир суу баргъан  ызланы  тартадыла эм  юйню ич эм тыш къабыргъаларын сюртедиле.      

Яслини къурулушу  былтыр башланнганды. Ала  «Демография» миллет проектни эм «КъМР-де билим бериуню айнытыу» къырал программагъа кёре   ишленедиле.