Къоркъуулу объектлеге - аслам эс

Кёп болмай Къабарты-Малкъарда Битеуроссей халкъ фронтну (ОНФ) келечилери жамауатны тилеги бла Нальчикде Дагъыстан орамда 41-чи номерли гимназияны къатында иеси эс бермеген,  атылгъан къурулушну тийресин тинтгендиле. Аны кезиуюнде мында мияладан, темирден эм башха материалладан  аслам къалгъан-къулгъан  жыйылгъанын, ол санда аслам хайыуан  мыллыкла болгъанларын да  тинтгендиле.    

Белгилисича, алгъаракълада айтыла тургъаныча, шахарда битмей тургъан къурулуш  объектле    уллу къоркъуу салгъан жерлеге саналадыла.  Аланы кёбюсюнде жаш адамла жокълайдыла, ол а   ата-аналаны  жарсытады.

- Комплексни иеси анга эрттеден бери эс бурмагъаны шарт кёрюнеди. Аны  киши сакъламайды, тёгереги бегитилип тюйюлдю, ол себепден  бери ким сюйсе да тынч  кирирчады. Аны бла бирге тийреде  эркинликсиз аслам  багуш тёгюлюп турады,   санитар-гигиена мардала  сакъланмайдыла.  Былайдан узакъ болмай  гимназия бла  сабий сад орналгъанын да унутургъа жарамайды.  Ала мында  заманларын ётдюрюрге,  ойнаргъа да угъай демейдиле. Чыгъарылгъан эсеплеге кёре,  объектни  иеси  жууукъ заманда сагъынылгъан кемчиликлени кетерирге борчлуду, дейди ОНФ-ни регион штабыны келечиси  Евгений Бакаев.

Жамауатчыла  проблеманы   Нальчикни мэриясына билдирип,  комплексни  иеси болумну тюзетирча – тёгерегин бегитирча эм  жерни кир-кипчикден  тазаларча эсгертилирин да айтхандыла.  
Магометланы Сулейман.