Губула жаяргъа боллукъ геморрагия безгек бла бир адам да аурумагъанды

Бизни республикада губула тири болгъан кезиу бошалгъанды деп айтыргъа боллукъду. Аны дагъыда бир игилиги – кърым геморрагия безгек бла быйыл бир адам да аурумагъанды. Шёндюледе губула къапхан сылтау бла медицина учреждениялагъа келгенлени саны иги да азайгъанды, деп айтылады Роспотребнадзорну КъМР-де Управлениясыны билдириуюнде. Саулай алып айтханда уа, быйыл губу къабып врачлагъа 707 адам баргъанды. Ол санда 251 сабий. Быллай шартла республиканы битеу районларында тохташдырылгъандыла. Тенглешдирип айтханда, бу кёрюмдюле былтырныкъындан ючден бирине аздыла.

Къоркъуулу кезиуде бардырылгъан профилактика жумушланы чеклеринде  губуланы санын азайтыугъа баш магъана берилген эди. Бу ишни къыйматлылыгъы шахар округла, районла, элле эмда организацияла анга неллай бир ахча къоратханлары бла байламлыды.

Алай бла быйыл анга битеуда эки бла жарым миллион сомдан артыкъ  къоратылгъанды. Тийишли тазалау жумушла 213,2 гектар жерде бардырылгъандыла. Ол санда билим бериу учрежденияланы, солуу базаланы, стадионланы, паркланы, санаторийлени, медицина учрежденияланы тийрелеринде да. Коронавирус жайылгъаныны хатасындан сабий саулукъландырыу учрежденияла бу кезиуде ишлемегендиле, аны себепли аланы тийрелеринде мадар этилмегенди. Санитар-эпидемиология служба да бу иш не халда бардырылгъанына дайым кёз-къулакъ болгъанлай тургъанды. Республиканы ветеринария службасы уа малланы юслерин тийишли препаратла бла тазалау ишни тамамлагъанды.

Кърым геморрагия безгек ауруу (аны асламысында губула жаядыла) чыкъмаз ючюн республикада тийишли тинтиуле бардырылып тургъандыла. Лабораториялагъа келтирилген беш бла жарым мингден артыкъ губудан  ол алтысында табылгъанды. Ала кеслери да Нальчик шахар округну, Май, Зольск, Черек эмда Элбрус районланы тийрелеринде ачыкъланнгандыла. Ол шарт алада эпидемиология болум доюн болмагъанын кёргюзтеди.

Роспотребнадзорну Управлениясы сагъынылгъан кезиуню ичинде кърым геморрагия безгекге губуладан жукъмазча адам кесин къалай сакъларгъа кереклисини юсюнден СМИ-де билдириуле этип тургъанды. Май айны биринчи жарымында телефон бла консультацияла берилген эдиле. Профилактика амалланы эмда болумну юсюнден информация газетледе эмда ведомствону Интернет сайтында басмаланып тургъанды.