Яслилени саны кёпден кёп бола барады

Звёздный элде яслини къурулушу тохтаусуз барады. Объект школгъа дери билим берген учрежденияны жанында ишлене турады, деп билдиргендиле Чегем районну жер-жерли администрациясындан.

Проектине кёре ясли бир къатлы мекям боллукъду, битеу да 500 квадрат метрни тутарыкъды. Анда методика эмда медицина кабинетле, физкультура бла кюреширча зал да къураллыкъдыла. Ясли битсе,  ары,  эки къауумгъа бёлюнюп, эки жыйырма сабий жюрюрюкдю.

Шёндюледе подряд организацияны ишчилери аны башын жабыу эмда отоуларын сюртюу бла кюрешедиле. Айтханларына кёре объектни къурулушу «Демография»  миллет проектни чеклеринде бардырылады. Ол быйыл декабрьде берилликди хайырланыугъа.