Канукоев атлы орамда ишле ахырына жетедиле

Нальчикде Долинск тийрелеринде Канукоев атлы орамда тынгылы жангыртыу ишле бардырылгъанлы бир ненча ай болады. Энди  ала ахыр кезиуюне жетгендиле. Аны юсюнден  шахар округну жер-жерли администрациясыны пресс-службасындан билдиредиле.

Подряд организацияны ишчилери жол тюбю бла баргъан инженер коммуникацияланы, суу быргъыланы да шёндюгю тюрлюлерине алышхандыла. Машинала жюрюген ызланы санын экиден тёртге жетдиргендиле. Жолну бир-бир жерлерин кётюргендиле эмда тюзетгендиле. Энди уа асфальт жайыла турады. Аны бла бирге эки жанында да жаяу жюрюгенлеге жолчукъла ишленедиле, чыракъла эмда маршрут транспорт тохтарча комплексле да орнатыладыла. Айтханларына кёре Ленин атлы проспектни жанындан келген жерде велосипедчилеге да энчи жолчукъ боллукъду.