Ара шахарда жолланы жангыртадыла

Нальчикде «Къоркъуусуз эм тынгылы  автомобиль  жолла» миллет проектни чеклеринде жолланы къыстау жангыртадыла, деп билдириледи мэрияны пресс-службасындан.  

Эсге сала айтсакъ, республика  жолланы игилендириу жаны бла проектни  графикден алгъа тамамлагъаны ючюн  къошакъ халда  ахчагъа тийишли болгъанды. Аны бла байламлы быйыл   жангыртыу ишле   ара шахарны энтта да беш участогунда  -  Тлостанов, Мальбахов, Вовчок, Мовсисян эм Иллазаров  атлы орамлада да  -бардырыладыла.  

Энчи айтханда Тлостанов  атлы орам тёрт ызгъа дери кенгертилликди,  кир суу баргъан системасы  алышынырыкъды эм  велосипед жолла да жарашдырыллыкъдыла. Марко Вовчок орамда да автобус тохтаучу комплекслени жангылары салынырыкъды.  Объектле барысы да бюгюннгю излемлеге келиширча боллукъдула, мурдорлары тынгылы этилгенден сора   асфальт жайыллыкъды, тротуарла ишленирикдиле эм чыракълары бла чыпынла  да  орнатыллыкъдыла. 

Подряд организацияла ишлени графикден кеч къалмай эмда  тынгылы  этерлерине   мэрияны специалистлери дайым кёз-къулакъ болгъанлай турадыла.