ЕГРН-ден къагъытны бек терк алыргъа боллукъду

Федерал кадастр палата жеринден тепдирилмеген мюлкню Бирикген къырал реестринден (ЕГРН) информацияны бериу сервис къурагъанды. Шёндюге дери андан жууап юч кюнню ичинде келиучю эсе, энди бу жумуш бир талай минутну ичинде тамамланырыкъды, деп билдиргендиле КъМР-ни Экономиканы айнытыу министерствосундан.

Сервисни адреси буду: spv.kadastr.ru. Ол шёндю ФГИС ЕГРН системагъа кёчген 51 регионда сынам халда ишлейди. Системагъа субъектлени бары да кёчгени бла аны битеу къыралда хайырланыргъа боллукъду.

Жангы платформа сагъынылгъан мюлкню юсюнден толу хапар, ол санда аны иеси ким болгъанын да билирге, тийрени кадастр планын кёрюрге, долевой къурулуш бла байламлы келишимлени юсюнден информация алыргъа онг береди. Аны хайырланырча ЕСИА порталгъа («Госуслуги») кирирге керекди. Заявка берлик адамны юсюнден хар неда андан алынады.

«Къырал жумушланы электрон халда тамамлаугъа сурам ёсе баргъаны себепли биз быллай сервис къураргъа оноу этгенбиз. ЕГРН-ден выписканы ары дери бир талай кюнню ичинде алыргъа бола эди. Ашыкъгъан адам а посредник сайтлада иги кесек тёлеп алай алып тургъанды аны. Энди уа, айтханыбызча, бу ишни хар ким да кеси бек женгил тындыраллыкъды», - дейди РФ-ни экономиканы айнытыу министрини орунбасары – Росреестрни башчысы Виктория Абрамченко.

ЕГРН-ден электрон халда берилген выписканы юридический жаны бла кючю  тёрели къагъыт документден башха тюйюлдю. Сервисде бир кезиуге эм азындан минг объектни юсюнден информация алыргъа боллукъду. Аны ючюн тёлеуню да сайтдан чыгъа турмай берирге.

Былтыр Кадастр палатагъа 74 миллион запрос берилген эди. Быйылны биринчи жарымында уа – 51 миллион. Жумушланы электрон халда тамамлаугъа сурам иги ёсе баргъанын ол шарт кёргюзтеди.