Ветеранланы, урушдан къайтмай къалгъанланы хурметлерине

«Хорламны агъачы» деген Битеуроссей экология-патриот  акцияны чеклеринде Прохладна районда Дейское элде орта школну къатында бир ненча  эмен эмда кюйрюч терекчик орнатылгъанды. Бу ишге къатышханла аны элден фронтха  кетген жерлешлерине атап бардыргъандыла. Хар терекчикни аллында ветеранны аты жазылгъан белги орнатылгъанды. Аланы юслерине уа сабийле Георгий тасмачыкъла къысхандыла, деп билдиргендиле Прохладна районну администрациясыны пресс-службасындан.

Башламчылыкъ ич ишлени органларыны районда бёлюмюню келечилеринден чыкъгъанды. Аны районну власть органлары, жамауат организациялары да дурус кёргендиле, сабийле да сюйюп къатышхандыла.

Терекчиклени орнатыуну башларны аллында школда къууанчлы жыйылыу болгъанды. Анда ОВД-ны башчысы Геннадий Кангашуев: «Биз бу ишни къыралыбызны тарыхында белгили ыз къойгъанлагъа хурметибизни билдириудю. Ол урушда жоюлгъанлагъа, андан сау къайтханлагъа да эсгертме боллукъду.  Бу жарыкъ кюн сабийлени эслеринде Ата журтха сюймекликни баямлагъан кюнча къалырына ышанабыз», - дегенди.

Акцияны чеклеринде битеу да 72 терек орнатыллыкъды. Аланы саны урушха кетген элчилени саны  тенгли бирди.