Элчиле таза суу бла жалчытынырыкъдыла

Терк районда Опытное элде жашагъанланы таза суу бла жалчытыу умутланы чеклеринде жангы скважина ишлене турады. Муниципалитетни жер-жерли администрациясындан билдиргенлерича, ол «Экология» миллет проектни «Таза суу» деген кесегини чеклеринде тамамланады. Миллет проектлени башха тюрлюлери бла бирге ол да адамланы жашау болумларын игилендириуге аслам себеплик  этерикди, деп белгилегендиле кеслери да.

Суу скважинаны къураргъа битеу да 3,4 миллион сом къоратыллыкъды. Жеринде ишни башларны аллында биринчиден алайда геология жаны бла тинтиуле бардырылгъандыла, специалистле жер тюбюнде суу табыллыгъын жик-жиги бла тохташдыргъандыла. Айтханларыча, скважина инженер сетьледен узакъда тюйюлдю, кеси да жерни теренине 170 метрге барады. Андан келлик суу а экология жаны бла иги да таза боллукъду.

Бу элде жай кезиуде суу къытлыкъ болгъанлай тургъанды. Алай бла энди, миллет проектни хайыры эмда республиканы властьларыны болушлугъу бла элчиле таза суу бла жалчытылынырыкъдыла. Хар не да тап барса, объект быйыл биринчи декабрьге битерикди, деп ышандыргъандыла районну администрациясында.