Жерлешлерибизни проектлерине – грантла

Кёп болмай Санкт-Петербургда «Выше крыши» экинчи битеуроссей жаш тёлю форумну  жабылыуу болгъанды. Анда грантлагъа тийишли  жаш тёлю проектле да белгиленнгендиле.  Аланы арасында Къабарты-Малкъар къырал университетни илму -тинтиу эм инновация ишле жаны бла управлениясыны келечилери да бардыла.  Аны юсюнден вузну пресс-службасы билдиреди.

Бу жол  конкурсха 276 заявка берилгенди,  аладан а 221 проект айырылгъанды.  Ишле   «Социал лифтлени айнытыу», «Жаш тёлю  медиа», «Спорт», «ЗОЖ», «Туризм», «Добровольчество», «Студент башламчылыкъла», «Фахмулу жаш тёлюню проектлери», «Патриотлукъгъа юйретиу», «Жаш тёлюню бла миллетлени арасында ангылаусузлукъ болмазча профилактика бардырыу», «Юйюрню сыйын багъалау» эм башха номинацияла бла байламлы болгъандыла. Грантха  Россейни 19 субъектинден  40 проект тийишли кёргюзтюлгенди.   Алагъа быйыл   саулайда 26 636 000 сом бёлюннгенди.

- Жыйылыуну эм магъаналы шартларындан бири   анга иги  кесек фахмулу жаш адам къатышханыды. Хар биригиз да   сейир  адамласыз,  къолугъуздан кёп зат келеди. Сизге тежеригим жаланда  кесигизге ышаныргъа юйренигиз, жетишимли болургъа итинигиз-, дегенди форумну къурагъан   Санкт-Петербургда жаш тёлю политика эм жамауат организацияла бла байламлыкъ жюрютюу комитетни таматасы Юлия Аблец.
Эки кюнню ичинде форумгъа къатышханла   лекциялагъа, дискуссиялагъа, мастрер-класслагъа, спортдан жараулагъа, тепсеулеге,  кёрмючлеге, концертлеге эм спектакльлеге да  жюрюгендиле.

Жерлешлерибиз  Темиркъанланы Асият бла Элина Бичканова биринчи кере къатышсала да,   «Школа сервиса и  гостеприимства «Фабрика успеха» бла «Коворкинг для молодых ученых «Futuroom»   проектлери  грантха тийишли болгъанлары бек къууандыргъанды.    

Биринчиси,   туриндустрияда уруннган специалистлени билимлери  халкъла аралы стандартлагъа келиширча онг тапдырыргъады.  Бёлюмде къармашханлагъа  68 сагъатны курсла   бардырыллыкъдыла, андан сора да,  жетишимли предпринимательле бла  беш  тюбешиу  ётерикди.  Экинчиси да,  КъМКъУ-ну мурдорунда тюрлю-тюрлю проектле бла кюрешген  студентлеге  бла аспирантлагъа ишлерин жашауда бардырыргъа  болушурукъду. Аны чеклеринде бардырылгъан  «FutuRoom»  билим бериу программмагъа кёре  268 сагъат чакълы  лекцияла, мастер-классла, сынамларын кючлерча  практика да  барлыкъды.  

Къызла проектлерин быйыл окъуна жашауда бардырыргъа таукелдиле.
Эсге сала айтсакъ, конкурсха 17-30 жыллары болгъан  фахмулу жаш  авторла къатышадыла. Аны баш магъанасы жаш алимлени  башламчылыкъларына болушургъады.