Алдау бла ишлеген байлыкъ къууанч келтирмез

Сатыу-алыуда бизни алдагъанларына юйренчек болуп къалгъанча кёрюнеди.  Бир-бир тюкенчиле базманда неда метрге алдамасала, файдасыз къаллыкъ сунадыла кеслерин. Алай ала бу дунияда аллай амал бла ишлеген байлыкъ ючюн къаллай жууап тутарыкъларыны юслеринден сагъыш нек этмейдиле?

Къуранда алдаргъа жарамагъаныны, бу ишни гюняхлыгъыны юсюнден быллай аят барды: «Сатыу-алыуда алдагъанны Жаханим сакълайды». (83:1). Абу Аббас былай билдиргенди: «Бир жол файгъамбар: «Беш ючюн беш»,-дегенди. Сахабалары аны не магъанада айтханын ангылатырын тилегендиле. Ол а былай айтханды: «Биринчи. Адамла келишимни бузадыла – Аллах алагъа душманны жиберликди. Экинчи. Аллахны жорукъларына кёре тергемегеннге Аллахутала факъыралыкъ берир. Ючюнчю. Саякълыкъ не къадар жайылса, ёлюм ол къадар кёп болур. Тёртюнчю. Сатыу-алыуда базманда неда метрде алдагъанлагъа желле жиберир, тирликлерини берекетин сыйырыр. Бешинчи. Закятны букъдурсала, Аллахутала къургъакълыкъ берир».

Малик ибн Динар, Аллах анга ыразы болсун,  къоншусу ёлюр отха жетгенин билип, аны кёрюрге баргъанды. Ол жаны чыгъа: отдан таула, отдан таула деп къычыргъанды. Малик ибн Динар алай нек айтханын сорады. Къоншусу уа: «Мени эки базманым болгъанды: бири бла кесиме тартханма, башхасы бла – адамлагъа. Эки базман да отдан таула болуп, бир бирлери бла къагъышадыла.  Ала хар ургъан сайын а санларым къатыдан-къаты ачытадыла»,-дегенди.

Алыучудан азчыкъ  урлагъаны ючюн сураллыкъ сунмайдыла. Алай Аллахутала аллайлагъа жаханимде энчи жерни тежегенди: «Уайлун» деген ауузну. Ары топуракъдан сау къаяны тёксенг да, асыры къызыудан ол терк окъуна кюйюп кетерикди.  

Мухаммад файгъамбар сатыучулагъа былай дегенди: «Сиз кесигизге аллыгъызда миллетлени жокъ этген жууаплылыкъны алгъансыз». Башха хадисде уа былай айтылады: «Алдагъан – бизден тюйюлдю», башхача айтханда, ол муслийман тюйюлдю.  

Алдагъанланы сакълагъан къадарны юсюнден хадисле энтта кёпдюле. Алай жюреклери ийманнга ачыкълагъа  башында келтирген юлгюле да тамамдыла.

Тикаланы Фатима хазырлагъанды.
Поделиться: