Танг ёсюм эсленеди

Былтыр Къабарты-Малкъарда эл мюлк производительле  54133,1 миллион сом багъасына  продукция чыгъаргъандыла. Ол буруннгу жыл бла тенглешдиргенде 5 процентге кёпдю. Алай бла  битимчиликде - 30654,3 миллион сомгъа эм малчылыкъ продукциядан да 23748,8 миллион сомгъа ашарыкъ сатылгъанды.  Анга кёре бёлюмлени экисинде да   5,8%  эм  4 процент ёсюм эсленеди. Саулай айтханда,   Къабарты-Малкъар былтыр эл продукция чыгъарыу бла  СКФО,  Ставрополь край бла Дагъыстандан сора ючюнчю жерде барады.

Республиканы эл мюлк  организацияларыны продукцияларыны ёлчеми    былтыр  4,3 азайгъанды.  Аны 34 процентин элчи фермер мюлкле эм 36 процентин да энчи предпринимательле жибергендиле.  Энчи арбазла чыгъаргъан продукция да 17 процентге азайгъанды, элчи фермер мюлкледе бла предпринимательледе уа 6 процентге ёсюм эсленеди.   Сёз ючюн,  былтыр эки къауумда бирге 19225,3 миллион сом багъасына продукция чыгъаргъандыла. Буруннгу жыл бла тенглешдирге ол 15,8 процентге асламды. 

Элчи фермер мюлкле продукцияларыны  асламысы неда 71,1 проценти  битимчилик бла байламлыды. Бу жаны бла бёлюм ишин айныта баргъанлы  14  жыл болгъанын да белгилерчады.   Саулай айтханда, Къабарты-Малкъарны  элчи фермер мюлклери  бла предпринимательлери СКФО-да жетишимлери бла жаланда  Ставрополь крайдан артха къаладыла.    
Былтыр энчи арбазла 18576,8 миллион багъасына эл мюлк продукция чыгъаргъандыла, ол да  буруннгу жылдан эсе 2,5 процентге  асламды. Бёлюмде къармашханланы асламысы малчылыкъ бла  кюрешгенледиле. 

Эсеплей чыгъара  айтханда, былтыр  Къабарты-Малкъарда эл мюлк продукцияны  ёлчеми 5 процентге ёсгенди. Ол, орта эсеп бла алып  къарагъанда  Шимал Кавказ федерал округда регионлада 4,2 процентге жетди,  саулай къыралда кёрюмдюден а  бир процентге кёп окъунады.    

 

Магометланы Сулейман.
Поделиться: