Жаш тёлюню коррупция уллу аманлыкъ болгъанына тюшюндюрюрча

   КъМР-ни  Жарыкъландырыу, илму эмда жаш тёлюню ишлери  жаны бла министерствосуну  Жаш тёлю кёп функциялы арасыны башчылыгъы бла  бу кюнледе "Тарыхны, экономиканы, правону, обществознанияны дерслеринде коррупциягъа  къажау кюрешни юлгюлерин хайырланыу" деген ат бла республикалы семинар бардырылгъанды. Аны ишине, устазладан сора да, КъМР-ни Башчысыны Администрациясыны, сагъынылгъан ведомствону, прокуратураны келечилери,  дагъыда  башхала   къатышхандыла.
       Бек алгъа  Жарыкъландырыу, илму эмда жаш  тёлюню ишлери жаны бла министерствону эксперти  Марианна Курамагомедова бу жыйылыуну муратын ангылатханды, ол  педагогланы право жаны бла билимлерин бла  культураларын кётюрюу болгъанын билдиргенди.  Ол жамауат  бюгюнлюкде кесини эркинликлерине  башха кёзден къарай башлагъанын черте, ахыр кере берилген ЕГЭ-лени бла озгъан жылладагъы экзаменлени къуралыуларын, бардырылыуларын да тенглешдиргенди. Арт  сынаулада коррупция иги да азайгъанын, ата-анала, сабийле да бузукълукъла этселе,  экинчи жылгъа къалыргъа боллукъларына тюшюне баргъанларын айырып айтханды.
    Дагъыда министерствону къуллукъчусуреспубликаны окъуу учрежденияларында коррупциягъа къажау онкюнлюкле бардырылып турлукъларын да билдиргенди. Ол себепден школлада, колледжледе, бийик окъуу юйледе бу семинаргъа къатышхан, ары дери озгъан курслада усталыкъларын ёсдюрген педагогла бютюн къадалып урунургъа тийишли болгъанларын, ала жаш тёлю бла  ишлеуню юсюнден материалланы, суратланы да кеслерини сайтларына салыргъа кереклисин эсгертгенди. Газетлеге билдириуле жибере турулса да  иги  боллугъун  айтханды. Алай бла курслада бла семинарлада устазла неге юйреннгенлери, мындан ары энчи  не затха  эс бурургъа кереклиси ачыкъланырыкъды,дегенди.
    Жаш тёлю кёп функциялы регион араны директору Саида Жанимова  уа "Стоп, коррупция" деген проектни чеклеринде къаллай ишле бардыргъанлары бла шагъырей этгенди. Ол айтханнга кёре, сабийле плакатла, эсселе  хазырлап, тюрлю-тюрлю конкурслагъа къатышхандыла. Андан сора да, "тёгерек столла", окъуу учреждениялада тренингле да къуралгъандыла. Коррупциядан чыкъгъан хата-палахны юсюнден шартла келтирилгендиле. Ол санда дипломну, машина жюрютюрге эркинлик къагъытны сатып алыу жашауда къаллай къыйынлыкъгъа келтирирге боллугъу  эсге салыннганды.
     Саида  айтханнга кёре, сабийлеге коррупцияны юсюнден биринчи айтылып башлагъан кезиуде  ала сансыз болуп, артыкъ эс бурмагъандыла.  Алай а артдан-артха ала да, тюрлю-тюрлю жумушлагъа къатыша, анга къажау турууну магъаналылыгъын  ангылагъандыла.   "День единых действий" деген ат бла битеу  республикада бардырылгъан проектден сора уа анга  бютюн  терен тюшюннгендиле. Аны кезиуюнде  плакатла, видеороликле хазырланнгандыла. Бек иги ишлери ючюн  ахча саугъала да берилгендиле.
   Декабрь  айда  башланнган онкюнлюклени юслеринден айта, докладчы  февральда не боллугъун билдиреди. Биринчи онкюнлюкде "тёгерек стол" къураллыкъды,  жаш адамла уа  плакатла бла Къабарты  орамгъа чыгъарыкъдыла, дагъыда кёп къыйматлы жумуш этилликди. Аланы барысына да  республиканы битеу окъуу учреждениялары къатышыргъа эркиндиле.
    Семинарны кезиуюнде кёпле сёлешгендиле. Ала школлада дерследен тышында бардырылгъан ишни кезиуюнде коррупция, улутхачылыкъ, бедишлик эмда бек хаталы затла болгъанларын, алагъа къажау бирча сюелирге  кереклисин,  ол аманлыкъчылыкъ бла кюрешде къаллай амалланы хайырланыргъа боллугъун арымай-талмай ангылатыргъа кереклисин дурус кёргендиле.