Предпринимательлеге себеплик этиуню, санаторийлени ишин игилендириуню юсюнден баргъанды ушакъ

«Иш кёллю Россей» жамауат организацияны КъМР-де бёлюмюню келечиси Гузеланы Индира, республиканы Правительствосуну къыралны ара шахарында эм Москва областьда сатыу-алыу-экономика жаны бла представительствосуну башчысы Альберт Шаоев, «Горный край» жамауат организацияны таматасы Дмитрий Макаренко эм бизнесни къоруулау жаны бла ишлеген адвокат Денис Ковалёв бу кюнледе Къырал Думаны депутаты Ирина Марьяш бла тюбешгендиле. Ушакъ Къабарты-Малкъарда эмда андан тышында гитче эм орта бизнес бла кюрешгенлеге, аланы товарларын башха регионлагъа сатаргъа себеплик этиуню эм башха темаланы юсюнден баргъанды, деп билдиргендиле биригиуню пресс-службасындан.

Дмитрий Макаренко таматалыкъ этген организациягъа кирген предпринимательлени Москвада эмда ол областьда ишлери къалай баргъаны, ала къаллай чурумлагъа тюбегенлери бла шагъырейлендиргенди. Денис Ковалёв а бизнесни келечилеринден аланы эркинликлерин къоруулау жаны бла къаллай тарыгъыулагъа тюбегенин билдиргенди. Дагъыда бизнес-биригиуле, ол санда «Иш кёллю Россей» бла да бирге предпринимательлени арасында жарыкъландырыу ишни бардырыргъа хазыр болгъанын белгилегенди.

Гузеланы Индира уа бизни республикада аны башламчылыгъы бла  рестораторланы, отельерлени, къонакъ юйлени индустриясында къармашханланы Ассоциациясы къуралгъанын билдиргенди. Аны КъМР-ни, Чечен республиканы эмда Ставрополь крайны келечилери да дурус кёргенлерин айтханды. Ирина Марьяш бла ушакъда бу регионлада санаторийлени солургъа келгенле бла жалчытыуну юсюнден сёлешгендиле.

Ассоциацияны келечилери «Къонакъбайлыкъны усталары» деген Битеуроссей конкурсха да тири къатышадыла, дегенди Индира. Бу эришиу кеси ишлеринде профессионалланы ачыкъларгъа, жангы тёреле къураргъа, сервисни стандартларын эмда туризм сферада усталыкъланы даражасын кётюрюрге, бёлюмню кадрла бла жалчытыргъа себеплик этеригин да белгилегенди ол. Анга атлары айтылгъан профессионалла, оноучула, туризм эмда аны бла байламлы организацияланы таматалары, студентле да къатышыргъа боллукъдула.

Ирина Марьяш тюбешиуню кезиуюнде кётюрюлген темаланы сюзюуге, сагъынылгъан чурумланы кетериуге законла чыгъарыучу органланы эмда жамауат биригиулени къошаргъа кереклисин белгилеп, бу иш къыйматлы жаланда ма алай тамамланырыгъын чертгенди.