«Медиаторну» эсеплери нени ачыкълагъандыла?

     Кёп болмай Железноводск шахарда жамауат башламчылыкъланы «Шимал Кавказ» арасы къурап  илму-практика конференция ётгенди. Анда Президент грантлагъа тийишли  болгъан  «Медиатор» проектни ишини   юсюнден айтхандыла. Аны магъанасы - Шимал Кавказда жашагъан миллетлени бирикдириргеди эм  динлени арасында ангылаусузлукъну кетериргеди.  

Проектни чеклеринде Шимал-Кавказ федерал округну (СКФО) регионларында  уллу социология тинтиуле бардырылгъандыла. Ол экиге бёлюннгенди. Биринчисинде акъылбалыкъ болгъанладан башлап пенсионерлеге дери  соруу этилгенди. Анга  хар субъектде беш жюз чакълы адам  къатышханды, саулай айтханда, 3500 респондент. Аны эсеплери уа тинтиулени экинчи кесегинде энчи экспертле эм   къауумла къатышхан тюбешиуледе хайырланылгъандыла.  

 Жыйылыуда  баш докладны проектни экспертлеринден бири, КъМР-ни Парламентини  Культура, граждан обществону институтларын айнытыу эм СМИ жаны бла комитетини башчысы Борис Паштов болгъанды. Ол СКФО-да  социал болумну эм бюгюнлюкде адамланы тириликлерини юсюнден шартла бла да шагъырейлендиргенди.      

 Алагъа кёре, соруу берилгенлени 76 проценти регионда экономика болумгъа бюсюрегенлерин, 39,2 проценти тамблагъы кюннге ышанмагъанларын, 87 проценти регионларыны башчысына ийнаннганларын,  37,3 проценти бир-бирледе кюч органланы ишлерин артыкъ бек жаратмагъанларын, 75,3 проценти митинглеге чыкъмазлыкъларын  билдиргендиле. Тинтиуле  бла байламлы шартла жууукъ заманлада «Медиатор» проектни сайтында басмаланырыкъдыла.  

- Бюгюннгю докладха  къысха багъа бергенде, жамауатда тынгысызлыкъ бла  тамблагъы кюннге  ышаныулукъсуз  эсленеди. Тинтиулени юсюнден айтханда, аланы  магъанасы уллуду. Проектни жетишимлиге санарча мындан арысында тири ишлерге  тийишлиди, - дегенди Борис Султанович. 

Конференциягъа къатышханла бир бирлерини  оюмларына да тынгылагъандыла. Ол санда келир заманда  соруулары бла анкетала хазырлаугъа психологланы да чакъырыргъа келишгендиле. 
Къарачай-Черкесни Башчысыны кенгешчиси Ёзденланы Алибек да проектни бардыргъанланы  ишлерине уллу багъа бичгенди. Мында сагъынылгъан эсгертиуле  саулай Россейни социологиясына хайырлы боллукъларын да чертгенди. 

Проектни чеклеринде вузланы студентлери бла тюбешиуле,  миллетлени эм динлени арасында байламлыкъла  жаны бла   кенгешле да ётгендиле. 
   

 Ахырында  «Кавказ.Мамырлыкъ. Айныу» араны таматасы Саида Сиражудинова,  проектни магъанасыны  юсюнден айта, аны хайыры бла  СКФО-да жамауатны жарсытхан кемчиликлени ачыкълау жаны бла уллу иш этилгенин, энди алагъа заманында эс бурулургъа кереклисин да белгилегенди.