Мен жаланда динни тазалыгъын сакълауну излейме

Къарчаланы Попоугъа  87 жыл болады. Ол Хасанияда жашайды. Диннге табыннган, аны теренлигине тюшюнюрге итиннген адамладан бириди.  Кёп китап окъуйду, бюгюнлюкде да Миллет библиотекагъа жюрюгенин къоймайды. Элде ауушхан адамны асырау бла байламлы бир-бир адетлени жаратмай, жюреги тынчаймай, ол жаны бла кеси окъугъан  затланы ачыкъларгъа, оюмларын айтыргъа излеп редакциягъа келгенди.  Биз бюгюн аланы басмалайбыз.

Динни юсюнден бир зат билген эсенг, аны башхалагъа билдирмесенг, эки инбашынга да ауурлукъ этгенлей турлукъма»,-дегенди Уллу Аллах. Диннге киришгеним Орта Азияда башланнганды. Биз Къазахстанны Каскелен районунда Ворошилов атлы колхозгъа тюшгенбиз. Анда иги библиотека бар эди. Бир кюн ары киреме да, китапланы къозгъап башлайма. Аланы араларында уа дин магъаналыла  да бар. Ма андан башланнганды мени сейирим ийманнга.  

Бюгюнлюкде да  аны жорукълары бла жашайма. Ол себепден терсликлерин кёрсем, тёзалмайма. Сёз ючюн, бюгюнлюкде бушуулада динде жазылып тургъан жорукъла толтурулмайдыла.  Ауушханны гюняхлары аз тюйюлдю,  ол аланы билипми, билмейми тындырады, башха тюйюлдю. Хар ёлген ал кезиуде жаханимге тюшюп башлайды. Алай болмаз ючюн, Аллахутала жан бергенни тёрт жанына  тёрт адам тохтап,  тийишли дууаны окъургъа буюргъанды. Ауушхан эшитип турады аланы, соруучула келселе, жууап да береди. Ол низам энди жюрюмейди.

Бушуу болгъан юйде юч кюнню эрттен дууа, зикир да этедиле. Бюгюнлюкде   бир бирледе ол жокъду. Ол а гюняхлы ишди. Дууасын жалчытмагъанлагъа ёлген жау болады. Ысхатсыз къояргъа да жарамайды. Ючюнчю кюн  мал сояргъа керекди.

Сора дагъыда адамны жыл саны келе башласа, ол осуят этерге борчлуду. Алайсыз дуниясын алышындыргъан эки жыйырма кюнню сёлешалмай турады. Сыйлы китапда айтылгъаныча, ысхатсыз, осуятсыз кетгенни хар иши жазылып турады.  Хар кимни да тёрт мёлеги барды, экиси кюндюз, экиси да кече жумушларын тохтатмайдыла.  Бир-бирле алай сунадыла, охо киши кёрмейди, муну алайым, букъдурайым деп.  Угъай, бары да тергеудедиле.

Адам жан бергенден сора сол жанында мёлеги битеу жазгъанларын кёкню жети къатысыны (жети планетаны) хар биринде къояды. Онг жанындагъы уа ёлген бла кёкню жети къатысына айланып чыгъады.  Алайлада да анга соруу этедиле,   хар тандыргъанына да багъа бичедиле.  Кюреше кетип, 37 кюнден сора келедиле сюд этерикни аллына. Ол айтады бу жаннга юч сутканы ичинде жаннетни, жаханимни да кёргюзтюгюз, эки жыйырманчы кюннге былайда болугъуз деп.

Айтылгъан кезиуде келедиле иги эм аман жумушларын жыйып.  Сууабы онг жанындагъы къапчыкъда, гюняхы уа – сол жанындагъында. Насыбы тутханны биринчидеги  женгер да, ол иги жулдузгъа (планетагъа) тюшер, гюняхлы уа – осалына. Ма олду  эки жыйырма деген тарих.

Бизде уа 52 кюнню белгилейдиле. Динде уа ол жокъду.    Жыллыкъны юсюнден сёз барса уа, китаплада жазылгъаныча, адам ёлгенден сора бир жылны,орусча айтсакъ, карантинде турады. Бу жорукъну жалчытсанг игиди, жюрютмесенг да борч тюйюлдю.   

Садакъаны магъанасы да бек уллуду. Жик дууада хуржунла къурауну терсге санагъанла кёпдюле. Алай ол бары да сууаплыкъды. Адамны гюняхлары ма ол зат бла кетедиле. Алай хар нени да мардасы барды.  Адамгъа, жаныуаргъа да игилигинг тергелмей къалмайды.

Бир тиширыу манга былай тарыкъгъанды: «Ёлген эгечиме садакъа къурайма, алай тюшюмде уа ол: «Манга буюргъанынгы башхала алып кетедиле»,-дейди.  Ма аны ючюн Аллахутала, мен муну эгечиме жоралайма, сен къабыл эт десенг, ол аныкъыды.

Хуржунланы  уа, бек алгъа, юч кюнню дууагъа жюрюп тургъанлагъа юлеширге тийишлиди, аланы къыйынлары барды. Андан сора жарлылагъа. Ала ючюн ахча жыйыуну мен дурус кёрмейме. Ол садакъа болмайды.

Бир жол маршруткада бара, аны шофёру бла хапаргъа киришеме. «Къарындашым ауушханды да, уллу бугъа союп юлешгенме»,-дейди ол. Мен а: «Ахча уа жыйгъанмыса?»,-деп сорама. «Хау, ол адетди да!»-деп жууаплайды. «Да сора сен тууарны этин сатып бергеннге сана да къой»,-дегенме.  Ол  манга бек ачыуланнган эди.

Бир ауукъ замандан а дагъыда кёрюшдюк. Ол атасын асырагъанын айтды. «Иги сагъыш этгенме да, сен тюз болгъанынга тюшюннгенме. Мал союп юлешгенме, кишиден капек да алмагъанма.  Энди ол элибизде адет болуп башлагъанды»,-деп билдирди.

Бюгюнлюкде  ачыу болгъан юйде халны да жаратмайма. Неда тойдача болуп къалгъанды. Жиляу жокъ, ашау,ичиу, лахор. Аллахутала, ёлгенни жиляусуз ашырмагъыз дегенди. Бетни жыртып угъай, сарнап, кёз  жашларын текген борчду. «Урушда ёлгенлеге уа?»- деп соргъандыла. Ол а алагъа мёлекле жиляйдыла дегенди.   

Энди бу оюмларым тюздю, терсди дерикле да чыгъарла. Мен кишиге да оноу этмейме. Окъуп билгеними айтама.  Дин жумушлагъа къарасанг, хар элде да башхалыкъ барды. Мен излеген а жаланда динни тазалыгъын сакълауду.