Даулашып, къолгъа бичакъ алгъанды

РФ-ни Следствие комитетини КъМР-де следствие управлениясыны къуллукъчулары 26-жыллыкъ жаш адамгъа ачылгъан уголовный ишни тинтип бошагъандыла. Ол РФ-ни УК-сыны 105-чи статьясыны 1-чи кесегине кёре терсленеди (мурдарлыкъ).
Следствияны оюмуна кёре, быйыл 30 июльда ингирде 20 сагъатда ол танышы бла аракъы иче болгъанды. Аны кезиуюнде даулашып, ишекли нёгерин столда тургъан бичакъ бла бек аздан сегиз кере ургъанды. Алгъан жараладан ол алайда ауушханды. 
Материалла сюдню къараууна берилгендиле.

Уручула тутулгъандыла

РФ-ни МВД-сыны Прохладненский муниципалитетле аралы бёлюмюню полициячылары уручулукъ этгенине ишеклини тутхандыла.  Аманлыкъны юсюнден полициячылагъа 25-жыллыкъ тиширыу билдиргенди. Аны  айтханына кёре, Прохладныйде тюкенледен биринден ким эсе да кийимле урлагъанды. 
Тинтиуле бардырып, уголовный розыскны къуллукъчулары бла участка уполномоченныйле ишеклини тапхандыла. Ол алгъын да башы бир ненча кере сюдлюк болгъан 43-жыллыкъ прохладначыды. Ол тюкенни эшиклерин ачып, 22 минг сом багъасы кийимле урлагъанына женгдиргенди. Бу шартла бла байламлы РФ-ни УК-сыны 158-чи статьясыны 2-чи кесегине кёре терслеу материалла жарашдырылгъандыла. 

Бешмингсомлукъну сермегенди

Быйыл 3 октябрьде РФ-ни МВД-сыны Май районда бёлюмюне 67-жыллыкъ эр киши тарыкъгъанды. Ол айтханыча, аллында кюн тюкенде ол алгъан затларына ахчаны тёлер мурат бла бешмингсомлукъну чыгъаргъанды. Ол кезиуде мекямгъа эр киши кирип, тюкенчиге соруула бергенча этип, аланы эслерин бёлгенди эмда  таматаны ахчасын  сермеп, къачып къутулгъанды. 
Тинтиуле бардырып, полициячыла ишеклини бир кюнню ичинде тохташдыргъандыла. Ол алгъын да сюдню оноуу бла бир ненча кере жууапха тартылгъан 56-жыллыкъ майскечиди. Анга РФ-ни УК-сыны 161-чи статьясыны 1-чи кесегине кёре терслеу материалла ачылгъандыла.

Аманлыкъчы 70-жыллыкъ тиширыудан 17,5 минг сомну сыйыргъанды 

Быйыл 29 майда Урван районну ОМВД-сына 70-жыллыкъ тиширыу келгенди. Ол   айтханыча, аны аллында кече ол танымагъан  биреулен Нарткъалада юйюню эшиклерин сындырып, отоууна киргенди. Аманлыкъчы тиширыуну къоркъутуп, бохчасын алып кетгенди. Аны ичинде 17,5 минг сом  бар эди. 
Тинтиу-излеу жумушланы кезиуюнде право низамны сакълаучула ишеклини тутхандыла. Ол Кахундан башы бир ненча кере сюдлюк болгъан 36-жыллыкъ эр кишиди. Анга уголовный иш ачылгъанды. 

Наркотиклени  кесине хазырлагъанды

Нальчикни транспорт прокуратурасы 45-жыллыкъ эр кишиге ачылгъан уголовный ишни къабыл кёргенди. Ол законлагъа бузукълукъла этип, наркотиклени сатып алгъаны, асырагъаны ючюн терсленеди (РФ-ни УК-сыны 228-чи статьясыны 2-чи кесеги).
Тинтиуледен ачыкъланнганыча, быйыл июльда ишекли Май районда «Бахсан-Прохладна» темир жолну 1944 километрини тийресинде ёсген кендирни чапыракъларын юзгенди. Алай бла ол законлагъа бузукълукъла этип, 121 грамм марихуана хазырлагъанды. Эр киши айтханыча, ууну ол кеси ичерге умутлу эди. 
Аманлыкъчыны ол кюн окъуна транспорт полицияны къуллукъчулары тутхандыла. Бу шартла бла байламлы материалла Прохладна районну сюдюне берилгендиле. Быллай аманлыкъ этгенни эркинлиги 10 жылгъа дери сыйырылыргъа боллукъду.