Теплицада заранлы къурт-къумурсхала болмазча

Былтыр ишлеп башлагъан «Чегем-Агро» теплица комплексде шёндю ишни къазауат баргъан кезиуюдю. Анда кёп болмай бадыражанладан биринчи тирлик жыйгъандыла, аны алыучулагъа жибергендиле. Предприятияны бёлюмлеринде производстволу жумушланы тийишдириу бла кюрешедиле, жангы теплицаланы къурулушун да башларгъа умутларын эсде тутадыла. Теплица комплексде шёндю бадыражанла 36,7 гектарда ёседиле. Бир жылгъа жыйырма минг чакълы продукция береди ол. Предприятие аны бизни къыралда кёп регионлада сатаргъа умутлуду.

Алгъаракъда ары Россельхознадзорну Шимал Кавказда регионла аралы бёлюмюню специалистлери келип, фитосанитария тинтиуле бардыргъандыла, деп айтылады ведомствону пресс-службасыны билдириуюнде.

Ала тёрт жюзден артыкъ энчи къапханчыкъла орнатып, алагъа тутулгъан къурт-къумурсхаланы ичинде заранлы тюрлюлери болгъанын тохташдырлыкъдыла. Ол санда ма быллайланы: къыбыла америкалы кюе эмда чапыракъ минер, гюл трипс, тютюн акъ къанат къубаллек, бадыражан минер эм башхаларын. Талай замандан сора къапханчыкъланы «Мирзеуню игилигине багъа берген араны» лабораториясына элтип тинтирикдиле.