Саулукъларын кючлер хыйсапда

Кёп болмай  Саулукъну битеудуния кюнюне жоралап Нальчикни ара солуу паркында «Хар кимге да саулукъ» деген марафон болгъанды. Акциягъа къатышханла терек бахчагъа кирген жерден  башлап Курорт залгъа дери 10 километрни ётгендиле. Спортчуланы жоллары  онеки точкадан къуралгъанды,- деп билдириледи КъМР-ни Саулукъ сакълау министерствосуну пресс-службасындан.

Марафон башланнгынчы шахарны 1-чи номерли поликлиникасыны келечилери акциягъа  чыкъгъанланы   кеси ыразылыкълары бла халлерин тинтгендиле. Ол санда къан басымлары, глюкозалары, бал тузлары мардадан атламазларын  ёнчелегендиле эм антропометрия жаны бла да шартлагъа эс бургъандыла. 

Бу жол акциягъа Нальчикни  медицина организацияларыны келечилери, волонтёрла, медицина бёлюмню студентлери эм саулукъларына уллу кёллю болмагъан башхала къатышхандыла.

Белгилисича, жюрюш адамны салугъун кючлерге, иммунитетин  кётюрюрге ахшы себеплик этеди. Бютюнда къарт адамгъа ол бек  игиди.  Аны кезиуюнде  къан кислород бла байыкъланады, семизлик кетеди, жюрек эм къан тамыр эм башха аурууланы къорууларгъа болушады.

Саулукъгъа магъаналы жумушну  «Миллетни саулугъуну лигасы» регион жамауат организация, КъМКъУ-ну медицина факультети, КъМР-ни Саулукъ сакълау министерствосу, Нальчик шахарны администрациясы эмда «Капитал МС» ООО -ну бёлюмю къурагъандыла.

 Эсге сала айтсакъ,  «Жашаугъа 10 000 атлам» деген акция РФ-ни битеу субъектлеринде бардырылады, аны мураты – къыралны битеу эллеринде бла шахарларында саулукълу жолла къурау жаны бла къымылдаугъа себеплик этиудю.