Электрон халда тёлеу - къыйматлыды

Къабарты-Малкъарда жашагъанла  «Свет Онлайн»  мобил  приложенияны  тири  хайырланырча «Россети Северный Кавказ» - «Каббалкэнерго»  биригиу аслам эс бургъанлай турады. Аны бла байламлы  Нальчикде бёлюмлеринден биринде абонентлеге тийишли  болушлукъ тапдырады. 

  Былтыр  «Россети Северный Кавказ» биригиу абонентле бла байламлыкъны кючлерча программаны жангы тюрлюсюн ишлетип башлагъанды.  Ол себепден «Свет Онлайн» приложениялары болгъанлагъа да  аны  жангыртыргъа  тюшгендиле.

- Бизни специалистлерибиз не заманда да  абонентлеге  болушургъа хазырдыла. Аны ючюн, ким болсада   бу адрес бла келип жарсытхан сорууун бераллыкъды. Нальчик шахар, Пушкин атлы орам 85-чи номерли юй 1-чи кабинет- деп билдиргенди  «Каббалкэнерго» биригиуюню бёлюмюню таматасы Андзор Кашежев.

Саулай алып айтханда, сагъынылгъан тюзюнлей-сервис ишлегенли бурунгу жыл апрельден бери хайырланылгъан  ток ючюн   77,9 минг адам 81,4 миллион сом  тёлегендиле. Быйылны юсюнден айтханда да, эки айны ичинде 8,7 миллион багъасына 7 минг тёлеу этилгенди.

Эсге сала айтсакъ,  «Свет Онлайн» приложение  абонентлеге тынч болурча,  офисге келе айланмай эм  кеслерине тап заманда тёлерча къуралгъанды. Ол себепден саулукълары осалла неда заман тапмагъанла   аны къыйматлыгъын  сезмей къоймайдыла.

 Аны смартфонлагъа бла айфонлагъа  GooglePlay эм  AppStore   браузерледен кёчюрюрге   жарайды.