«Бизге да кёл этдире, кеслери да жарыкъ болуп келедиле айырыулагъа»

Россейни Президентин сайлауну ючюнчю кюню барады. Къабарты-Малкъарны инсанлары къол кётюрюуге тири къатышадыла. Биринчи кюнде окъуна кеслерини инсанлыкъ борчларын айырыучуланы жартысындан асламы толтургъандыла.

 КъМР-ни Айырыу комиссиясы белгили этгенича, эки кюнню ичинде 417932 адам къол кётюргендиле. Ол а айырыучуланы 77,37 процентиди.

Бийик тау эллерибизден бири Огъары Малкъарда да жамауат Россейни Президентин сайлаугъа жууаплы кёзден къарагъанды. 326-чы номерли участканы башчысы Мамайланы Кязимни бизге айтханына кёре, 17 мартда 13 сагъатны тарыхлерине кёре, участканы эсебинде болгъан 1180 адамдан кеслерини сайлауун 900-ге жууугъу этгендиле.

Участка Огъары Малкъарны 2-чи номерли орта школуну мекямында орналады.

- 15 мартда эрттенликде 8 сагъатда Россейни Гимнин согъуудан башлагъанбыз ишибизни. Бек биринчи уа бизге КъМР-ни билим бириуюню сыйлы къуллукъчусу Карчаланы Халимат келген эди, - дегенди Кязим бизге.

Аны айтханына кёре, къол кётюрюу  къуралыулу барады. Участкада КъМР-ни Жамауат палатасындан бла КПРФ партиядан жамауат къараучула да бардыла. Ала кемчиликлени, законлагъа бузукълукъланы ачыкъламагъандыла. Дагъыда волонтерла да болушадыла къол кётюрюуню бардырыугъа.

- Таматала, жаш адамла да къыралыбызны башчысын сайлаугъа уллу магъана берип келедиле. Абаданлагъа, саулукъларына кёре участкагъа кеслери келалмагъанлагъа уа комиссияны келечилери юйлерине барадыла. Аллай сыйлы таматаларыбыздан бири Цийкъанланы Мухадин хажи да толтургъанды инсанлыкъ борчун. Дагъыда бизни участкада КъМР-де Жарашдырыучу судьяланы ишлерин къурау службаны башчысы Муртазланы Борис да этгенди сайлауун,-дегенди Мамайланы Кязим.

Иван Таранны атын жюрютген чекчи застава да бу участкагъа киргенди.  Кязим билдиргенича, къол кётюрюуню аллында анда айырыучуланы тизмеси берилгенди.  «Заставада къуллукъ этгенле сайлауларын ишлеген жерлеринде толтургъандыла»,-деп къошханды ол.

Сайлауларын этерге келгенлеге байрам къурау бизни ариу тёрелерибизден бириди. 326-чы участкада да той-оюн болгъанды. Школда музыкадан устаз Цепишланы Алий жыр айтханды.  Ол кеси да комиссияны келечиси болгъанын айтырчады. Дагъыда Къулийланы Къайсын атлы къырал драма театрны артисти Алтууланы Халимат да жыр айтып жыйылгъанланы кёллерин алгъанды.

- Айырыучуланы къууандырайыкъ деп, бир гитче той да къурагъанбыз.  Малкъарны адамы жарыкъ кёллюдю, чам-лакъырда эте да биледи. Адамла  бизге да кёл этдире, кеслери да жарыкъ болуп келедиле айырыулагъа,-дегенди Кязям.

Тикаланы Фатима.