Элбрус районда айырыулагъа тири къатышадыла

Элбрус районда битеу да 21 айырыу участка барды. Аладан бири Бедикни сабий садында орналыпды. РФ-ни Президентин сайлау бла байламлы къол кётюрюрге айырыу участкагъа  Ахматланы юйюр да келгенди.

 Бу юйюрде он сабий барды. Элдар бла Анжела юйюр къурагъанлы отуз жыл болады. Анжела он сабийни ёсдюргени ючюн бийик къырал саугъагъа - «Жигит ана» деген атха тийишли болгъанды. Юйюрню башчысы айтханнга кёре, ала сабийлерин Ата журтларын сюерге, ахшы адет-тёрелерибизге таяна ёсерге дайым юйретгенлей турадыла.

 Бу участкада Гайыланы юйюр да инсан борчун толтургъанды. Махти бла Зухура быйыл бирге жашагъанлы 50 жыл болады. Ала Бедикде юч сабий ёсдюргендиле, энди уа тёрт туудукъну аягъы юсюне салыргъа къайгъырадыла. Айырыулагъа кеслерини инсан борчларын толтурургъа сюйюп келгендиле, къыралны андан ары айныуу да тири барлыгъына толу ышанадыла.