Айырыулагъа хазырлыкъ сорууланы сюзгендиле

Къабарты-Малкъар Республиканы Башчысы Казбек Коков жер-жерли администрацияланы таматалары бла кенгеш бардыргъанды, анда Россей Федерацияны Президентине айырыулагъа хазырлыкъ соруулагъа къаралгъанды.

Жыйылыугъа КъМР-ни Айырыу комиссиясыны таматасы Вячеслав Гешев да къатышханды. Ол билдиргеннге кёре, республикада РФ-ни Президентине айырыулагъа хазырланыуну эмда бардырыуну КъМР-ни Айырыу комиссиясы, 13 жер-жерли эмда 355 участка айырыу комиссия жалчытадыла. Ишге айырыу комиссияланы келечилеринден бла аланы аппаратларындан – КъМР-ни Избиркомундан ишчиледен юч минг чакълы бир адам, 3 шахар округда бла 10 муниципал районда жер-жерли комиссияла, участок комиссияла къошулупдула.

Вячеслав Гешев къол кётюрюучюлеге хапар билдириу «ИнформУИК» федерал проектни бардырыуда республика эм иги регион болгъанын да белгилегенди. 17 февральдан 7 мартха дери участка айырыу комиссияланы келечилери 281 477 юйге баргъандыла – 99,9 процент – эмда къол кётюрюучюлеге Россейни Президентине айырыуланы юсюнден билдиргендиле. Ол ишге 1434 обходчик къатышханды.

Казбек Коков шахар округланы бла эллени хазырлылыкъларыны юсюнден муниципал администрацияланы оноучуларыны айтханларына тынгылагъанды. Республиканы таматасы 15-17 мартда айырыуланы кюнлеринде инсанланы къоркъуусузлукъларын эм ырахатлыкъларын жалчытыу соруулагъа энчи эсин бургъанды.