Умуту – эришиуледе хорларгъа

Былтыр биринчи кере республикада «Къабарты-Малкъарны ёхтемлиги» деген эришиу бардырылгъанды. Аны республиканы жаш тёлюсюню ассоциациясы Жаш тёлюню ишлери жаны бла министерствону себеплиги бла къурагъанды. Эришиуню мураты регионну бла къыралны айныууна себеплик этген жаш адамланы ачыкълау эм хурметлеу болгъанды.

Эришиу он бёлюмде ётдюрюлгенди, анга 18-35-жыллыкъ адамла къатышхандыла, аланы араларында ишлеринде устала, предпринимательле, алимле, волонтёрла, спортчула да бар эдиле. Хорлагъанны уа интернетде къол кётюрюу  бла сайлагъандыла. Алай бла «Жылны спортчусу» (спортда болдургъан жетишимлери ючюн) бёлюмде республикадан тышында окъугъан неда ишлеген жаш адамланы араларында сертификат бла Гюлюйланы Тамерлан саугъаланнганды. Тамерлан Элбрус районну олимпиада резервли спорт школунда ауур атлетика жаны бла жарау этгенди, спортну устасыды, кёп даражалы эришиуледе хорлагъанды, Россейни жыйымдыкъ командасына киреди.

Гёжефни тренери Муаед Шаов билдиргеннге кёре, Тамерлан ауур атлетика бла тогъуз жылында кюрешип башлагъанды. Гитчеликден да муратына жетиуде къатылыгъы, итиниулюгю бла айырмалы болгъанды, ол ышанларыны хайырындан хорлап да терк башлагъанды. Бир жылны къыстау жарау этгенинден сора, биринчи эришиую – Къабарты-Малкъарны биринчилигине  атланнганды, анда биринчи жерни да алгъанды. Аны ызындан юч жылда да республикада ётдюрюлген битеу эришиуледе алчылыкъны ычхындырмагъанды.

2018 жылда Тамерлан  Владимирде Россейни 17 жыллары толмагъан гёжефлени араларында биринчилигине къатышханды, кесине уа ол кезиуде 14 жылы толуп. Жашлыгъына, быллай даражалы эришиуге биринчи кере баргъанына къарамай, ол  спортну устасына кандидатны мардасындан уллу ауурлукъну кётюргенди, бешинчи жерге да чыкъгъанды. Бир жылдан а къырал биринчиликден «кюмюшню» келтиргенди. Дагъыда бир жылдан а спортну устасына марданы да толтургъанды. 

2021 жылда юч уллу эришиуге къатышханды эм барысында да жетишгенди. Алгъа Россейни биринчилигинде хорлагъанды, ызы бла Европаны биринчилигинде ючюнчю болгъанды, дунияны биринчилигинде да бешинчи жерни алгъанды, эришиуню даражасын эм спортчуну жыл санын эсге алсакъ, ол да бийик кёрюмдюдю. Андан сора къыралны юниор биринчиликлеринде эки кере «алтынны» къытханды, спартакиадада, башха турнирледе да саугъа жерлеге чыкъгъанды. Былтыр, саулугъуна чып тюшюп, ауукъ заманны жарау этмей тургъанды. Бир кесекден а, жангыдан кюч алып, къырал даражада биягъы хорлагъанды.

Ара шахарны олимпиада резервли училищесине  киргенден сора, Тамерлан эришиулеге Къабарты-Малкъарны эм Москваны атындан къатышып тебирегенди. Училищени  тауусханлай,  Физкультураны россейли къырал университетине киргенди, бусагъатда биринчи курсну студентиди. Ол турнирлеге энтта юч жылны юниор эм жаш тёлю даражалада къатышырыкъды, аланы барысында да хорларгъа мураты барды.