Кёп тюрлю тасхала бла шагъырей этгендиле

Кёп болмай, «Иш кёллю Россей» жамауат организацияны Къабарты-Малкъарда бёлюмю къурап,  Нальчикде «Decorator» салонда  «Франшиза: эки жанындан да кёз къарам» деген ат бла «тёгерек стол» ётгенди.  Бу жол анга жыйырмагъа жууукъ предприниматель къатышханды.

 Тюбешиуде эксперт «Макарунс» сабий араны иелеринден бири, фахмуну ачыкъларгъа болушхан Диана Апшева (Дышекова) франшизаны, ол санда продукциясыны  юсюнден тынгылы хапар билдиргенди.  Ызы бла адамны хунерин ачыкъларгъа болушхан «Вербатория» диагностика  араны, «Фабрика Предпринимательства Дети» бизнес-школну,  «Сила Слова» школну  таматасы,  CASHFLOW  бизнес-клубну таматасы, Global Intellect Service UDS биригиуню партнёру  Залина Нагоплова биринчи атлам эте башлагъанлагъа  сынамлы  франшизаны сайларгъа юйретгенди.

Къабарты-Малкъарда  предпринимательлеге болушлукъ тапдыргъан араны таматасыны орунбасары Османланы  Залина да къыралны жанындан бизнесменлеге эм кеслери бир тюрлю иш бла кюрешгенлеге къаллай болушлукъ этилгенини юсюнден тынгылы хапар айтханды.  

Нальчик шахар округну администрациясында   инвестиция проектле жаны бла  специалист, «Иш кёллю Россей» организацияны  толтуруучу таматасыны орунбасары, Scrum-мастер эм  маркетолог Таумырзаланы Салидат  Россейде  франчайзингни ассоциациясыны(РАФ) ишинден билдиргенди.  Андан сора да, белгили компанияладан жиберилген мингнге жууукъ предложенияла бла шагъырей этгенди. 

Тюбешиуню чеклеринде  предпринимательле сынамлы коллегаларына  франшиза бла байламлы кёп тюрлю соруу бергендиле. Аланы барына да тынгылы жууап тапхандыла.  Ахырында кётюрюлген тамала бири къалмай  «Иш кёллю Россей» регион комитетни    франчайзинг жаны бла планына кийириллиги да эсгертилгенди.