Фахмулулугъун белгилегендиле

Жазыу иш кимге алгъаракъдан келеди. Аны кечирек башлагъанланы хапарларын да эшите турабыз. Бу хапарыбызны жигити да аллай адамларыбыздан бири Чеченланы Алийди.

Алгъаракъда Москвада ол «Наследие» деген адабият премияны номинанты болгъанды, энчи майдал бла саугъаланнганды, чыгъармасы да ол саугъаны жыйымдыкъ китабында басмаланнганды.

Бу саугъаны юсюнден къысха билдирейик. Аны Россейни Жазыучуларыны союзу бла Уллу бийче Мария Владимировнаны жакълауунда болгъан Россейни Император Юйю къурагъандыла. Тёрели маданият байлыкъланы сакълагъан фахмулу авторланы излер ючюн этилгенди ол. Бюгюнлюкде аны таматасы Мария Владимировнады. Саугъаны уа Алий Россей Жазыучуланы союзуну таматасы Дмитрий Кравчукну къолундан алгъанды.

Чечен улуну жашау жолуну юсюнден айтханда, ол 1963 жылда Хабазда туугъанды. Орта школну да анда тауусханды. Андан   сора университетни тарых бёлюмюнде окъугъанды.

Аны бошагъандан сора жашны Каменномост элге школгъа жибередиле. Анда тарыхдан устаз болуп бир жыл ишлейди. Сора аскерге чакъырадыла. Алийни лейтенант чыны бар эди. Бир жылдан а анга тамата лейтенант чын бередиле. Батальонну штабыны таматасы болуп турады.

Къуллугъун бошагъандан сора ол элине къайтады. Алгъа комсомолну секретары болуп ишлеп башлайды. Бираздан а Эл советни председателине айырадыла. Токъсанынчы жылла къыйын эдиле, къыралда уллу тюрлениуле башланнган кезиу. Алийге уа 26-27 жыл болады, алыкъа жаш адам, эл а аны оноууна къарайды. Чечен улуну тюз оноуу бла элде тынчлыкъ-ырахатлыкъ сакъланнганды, орамлагъа ремонт этилгенди.

Ол заманлада телевизор жаланда эки канал тута эди. Спутник антенна орнатып, телевизорла кёп каналла тутарча да этгенди ол. Алайда тёрт жыл ишлейди. 1994 жылда уа ишин башхагъа ётдюрюп, кеси уа Шалушкагъа кёчеди.

Усталыгъына кёре иш тапхан тынч болмагъанды. Болсада Алий, иш кёллю адам, бош турмай, сатыу-алыу бла да кюрешгенди. Къурулушда да ишлегенди, мал жайгъанды, сют продукция да чыгъарып тебирегенди. Миллетибизни бурунладан келген суусапларындан бири – таулу айранны этип, сатып да тургъанды. Шёндю ол ишин гитче жашына ётдюргенди.

Кеси уа къурулушха кёчгенди.  Юй тышлауну жангы амалына юйренип, аны бардырады. «Жашауда жангы ишни кёрсем, анга юйрениригим, аны эбине иги тюшсем а, башхаланы да юйретиригим келеди»,-дейди Алий ушагъыбызда.

Жыйырманчы жылда уа ол  «Черекская трагедия» китапны окъуйду.  Андан сора ол«Черекская трагедия – души неугасающая боль» деген поэмасын жазады. Саугъагъа да ол чыгъармасы ючюн тийишли болгъанды. Андан сора  «Хакимни жоллары»,

«Ахыяны сейирлик жашауу», эм дагъыда кёп башха назмула бла поэмала да чыгъадыла аны къаламындан.

Алий дайым излеуню жолундады. Мындан арысында да сейир чыгъармалары, жетишимлери бла окъуучуланы къууандырыр деп сакълайбыз.