Жолланы тапландырыуда айырмалыла

Кёп болмай Москвада «Транспортну ыйыгъы-2023» деген халкъла аралы кёрмюч-форумда Шимал Кавказдан  Къабарты-Малкъар бла    Чечен республикала  «Къоркъуусуз эм тынгылы автомобиль жолла» миллет проектни жетишимли бардыргъанлары ючюн  саугъаланнгандыла.

Ол кюн  айырмалыланы РФ-ни Правительствосуну Председателини орунбасары  Марат Хуснуллин белгилегенди.  Эм игилени бир къауум шартха кёре сайлагъандыла. Ол санда: салыннган борчну толтуруу, жууаплылыкъ, къурулуш материалланы зырафсыз хайырланыу, жамауат бла байламлыкъ жюрютюу эм башхала. 

Омакъ эм  къоркъуусуз болгъанды

Кёп болмай «Къоркъуусуз эм качестволу автомобиль жолла» миллет проектге кёре Огъары Малкъарда Мухол микрорайоннга баргъан жолгъа тынгылы ремонт этип бошагъандыла. Объектни узунлугъу 1,8 километрге жетеди.

Ишлени кезиуюнде подряд организацияны келечилери  жолну мурдорун кючлегендиле, жардан таш, топуракъ оюлмазча къалын бетон хунала къуйгъандыла, бир-бир жерледе аланы бийикликлери юч метрге  жетеди.  Андан сора да, жауун суу саркъырча арыкъла бла быргъыла, бордюрла салгъандыла эм ахырында  эки къат асфальт жайылгъанды.
Къоркъуусузлукъгъа да аслам эс бурулгъанды, ол санда чыпынлы чыракъла, темир эм бетондан «Нью-Джерси» тюрлю буруула эм жорукъланы билдирген белгиле да орнатылгъандыла.

Тийишли комиссия  объектде тёгерек-башха къарап, этилген ишлеге уллу багъа бичгенди.  Жол мюлк управленияны келечилери да  асфальтны къалынлыгъы тийишлисича болгъанын айтхандыла. 
- Жол къыйын тау жерде орналады. Мында  къоркъуулу иги кесек тик барды. Болсада подряд организацияны келечилери салыннган борчну болжалдан кеч къалмай толтуралгъандыла, - дейди участокну таматасы Арсен Кушхов. 

Бусагъатда специалистле тёбенде орналгъан  Черек сууну кёпюрюн игилендирип кюрешедиле. Ол Огъары Малкъар бла Мухол бирге къошулгъан эм  Къашхатаугъа  баргъан баш  жолдады. 

Жангы излемлеге келишеди

Бу кюнледе «Къоркъуусуз эм тынгылы автомобиль жолла» миллет проектге кёре «Урвань – Уштулу» федерал эм «Эски Черек – Жемтала – Сукан-Суу» регион магъаналы жоллагъа, саулай алып айтханда 2,3 километр чакълы бирге тынгылы ремонт этилгенди.

Сагъынылгъан  жолну кёбюсюнде  Жемталада, Зарагижде, Огъары  Жемталада жашагъанла  Къашхатаугъа  барыр ючюн хайырланадыла. Ол себепден ол узакъ элде жашагъанлагъа болмагъанча магъаналыды.

Ишлени кезиуюнде подряд  организацияны келечилери жолну мурдорун кючлегендиле, бордюрла салгъандыла, бетондан хунала ишленедиле, темир буруула тархандыла, улоу тохтарча жерле къурагъандыла, эки къат асфальт жайгъандыла эм белгилени жарашдыргъандыла.  Сагъынылгъан участокда Черек сууну  юч кёпюрюне да  къаралгъанды.