Ауругъанлагъа пособие тёленеди

2023 жылда Социал фондну республикада бёлюмю 47 334 ауругъаннга пособие тёлегенди, аны ючюн 42 миллион сом къоратылгъанды. 22 350 пособие проактив амал бла тохташдырылгъанды, адамлагъа ахчаны алыр ючюн заявление жазаргъа керек болмагъанды. Больничный листле къырал жумушланы порталында жарашдырылгъандыла. 

Инсан болжаллы халда ишлерге онгу болмагъаныны юсюнден пособие электрон больничныйге кёре бериледи. Больничный лист медицина учреждениядан иш бла жалчытхан жерге тюзюнлей жибериледи, ол да, пособие тергелирча, больничный жабылгъанлай юч ишчи кюнню ичинде къагъытланы Социал фондха иеди. Ахча он кюнден кеч къалмай тёленеди.

Больничныйни ёлчеми адамны урунуу стажына эм ахыр эки жылда иш хакъына кёре саналады. Ол сегиз жыл эм андан асламны ишлей эсе, айлыгъыны 100 проценти тенгли боллукъду, 5-8 жыл ишлегенни – 80 процент, беш жылдан азгъа уа – 60 процент. 2023 жылдан башлап иш хакъны бир кюннге ёлчеми орта эсеп бла 2 736 сомдан кёп болмазгъа тийишлиди. Инсан саулугъуна бакъгъан кезиуню биринчи юч кюню ючюн ахчаны иш бла жалчытхан организация, къалгъанын а Социал фондну регион бёлюмю тёлейдиле. Алай адам, карантинде болуп, юйюрде ауругъаннга къарап, ишге чыгъалмай эсе, протезированияны ёте неда саулугъун тюзетирге дагъыда санаторийде жатаргъа тюшген эсе, ахчаны биринчи кюнден башлап фонд береди.