Жангылыкъла

Долинскде    пластика хирургияны бла стоматологияны «Си Мед» илму-практика  арасында  Сабийлени къоруулауну халкъла аралы  кюнюнде  къызчыкълагъа бла жашчыкълагъа байрам къурагъандыла. Алагъа оюнла къурап,  татлы ашарыкъла, кёгетле бла сыйлагъандан,  мультфильмле кёргюзтгенлеринден сора да, хар бирини  тишлерине къарап, алыныргъа, бакъдырылыргъа кереклисин да айтхандыла, къалай тазаларгъа боллугъун  да оюн  халда юйретгендиле. Жилямагъанлагъа уа саугъала, «сыйлы грамотала»  да бергендиле.

Шимал Кавказда регионла аралы сеть компанияны (МРСК СК) Ингушетияда, Шимал Осетияда, Къарачай-Черкессияда, Ставрополь крайда эмда Къабарты-Малкъарда бёлюмлерини специалистлерине деп «Каббалкэнергода» онкюнлюк окъутуу курс бардырылгъанды. Анда энергетиклени компания аз-аздан сингдире баргъан «Omni-UtilitieS» деген автоматизацияланнган информациялы системаны хайырланыргъа юйретгендиле.

«Каббалкэнерго» къоранчланы кетерир ючюн тири кюрешгени себепли быйыл биринчи кварталда  1,1 миллиондан артыкъ киловатт-сагъатны аяргъа онг табылгъанды.   Ол а  Элбрус районну он кюнню, Тёбен Черек элни уа юч айны  ток бла жалчытыргъа жетерик эди.

РФ-ни Налогла службасыны Къабарты-Малкъарда бёлюмюнде быйыл биринчи кварталны эсеплерин чыгъаргъандыла. Ведомстводан билдиргенлерича, бу кезиуге  4,8 миллиард сом жыйылгъанды. Аны бла план бла белгиленнген кёрюмдюню 20,2 процентге артыгъы бла толтурургъа къолдан келгенди.

Бу кюнледе Азербайджанны ара шахары – Бакудагъы  Экспо Арада аш-азыкъны 25-чи халкъла аралы кёрмючю - WorldFood Azerbaijan 2019 бардырылгъанды. Анга Россейден, Украинадан, Литвадан, Хорватиядан эмда кёп башха къыралладан эки жюзден артыкъ компания бла предприятие къатышхандыла. Миллет стендлерин а бизни къырал, Беларусь, Италия, Турция эм Шри-Ланка хазырлагъан эдиле.

«РусГидро» компанияны Къабарты-Малкъар  Республикада бёлюмюнден билдиргенлерине кёре, регионну ГЭС-лери, быйыл жаз башы - жай кезиуде черекле кётюрюлюу кезиуге толу хазыр болгъандыла. Бёлюмню тамата инженерини орунбасары Резуан Ашевни  башчылыгъы бла ишлеген комиссия аны бла байламлы актха бу кюнледе къол салгъанды.

Кёп болмай КъМР-ни саулукъ сакълау министри Марат Хубиев жангы республикалы сабий клиника больница (РДКБ) боллукъ мекямда ремонт  къалай баргъаны бла шагъырейленнгенди, деп билдиргендиле КъМР-ни Салукъ сакълау министерствосуну пресс-службасындан. 

Кёп болмай Май муниципал районну Александровское элинде мал ашла чыгъаргъан «Голдкорм» завод сынау халда ишлеп башлагъанды, деп билдиредиле КъМР-ни Эл мюлк министерствосуну пресс-службасындан. 

Пенсия фондну Черек районда управлениясыны башламчылыгъы бла Черек районну Бабугент элини школуну устазларына пенсия системаны, анда бола тургъан тюрлениулени ангылатыу бла байламлы семинар къуралгъанды, аны управленияны ишчилери Башийланы Расул бла Атабийланы Амина бардыргъандыла.

Аналыкъ капиталны программасы ишлегенли аны республикада  65312 юйюр алгъандыла, аладан 66,2 проценти берилген ахчаны хайырланып бошагъандыла.