Спорт

Бесланда боксдан СКФО-ну биринчилиги бардырылгъанды. Анга округну жети регионундан 2005 – 2006 жыллада туугъан 160-ха жууукъ спортчу къатышхандыла. Ала 20 ауурлукъ къауумда сермешгендиле.

Анда Элбрус районну «Элбрус» спорт школундан Гежаланы Далхат (38,5кг.) алтын майдал къытханды. Ол юч тюбешиуюн да хорламла бла бошагъанды, осетинли эм эки чеченли боксчугъа аз да онг бермегенди.

Тырныауузну «Геолог» физкультура-саулукъ кючлеу комплексинде боксдан «Россейни жашлыгъы» обществону чемпионаты болгъанды. Ол IBF эм WBC жаны бла дунияны континентле аралы чемпиону Доттуланы Ахматны хурметине  тёрели халда бардырылгъанды. Турнирде  къыралны башха-башха регионларындан 100-ге жууукъ боксчу сермешгендиле, хорлагъанлагъа «Спортну устасы» деген сыйлы ат эм Россейни боксдан чемпионатыны финалына къатышыргъа онг берилгендиле.

«Единая Россия» партия арбаз футболдан битероссей фестиваль бардырыргъа хазырланады. Муниципал эм регион бёлюмде командаланы сайлау 18 майда башланырыкъды.

Нальчикни Сабий стадионунда республиканы ёлген тренерлерини хурметлерине женгил атлетикадан битеуроссей эришиуле бардырылгъандыла. Анга 2001-2004 жыллада туугъан эм абадан спортчула къатышхандыла.

Чеченни ара шахарында каратеден СКФО-ну биринчилиги эмда Грозныйни мэрини кубогу ючюн эришиуле бардырылгъандыла.

Нальчикден «Нарт» регби клубну келечилери ЮФО-ну бла СКФО-ну командаларыны лигасына къатышхандыла.

Нальчикде дзюдодан окъуучуланы спартакиадасы бардырылгъанды, анга 18 жыллары толмагъан жашла бла къызла къатышхандыла.

Космонавтиканы кюнюне аталып Нальчикде эркин тутушуудан шахарны биринчилиги бардырылгъанды. Анга 2006-2009 жыллада туугъан жашчыкъла къатышхандыла. Анда «Хасания» спорт клубда жарау этгенле кёп майдал къытхандыла.

Орёл шахарда всестилевой каратеден 12-18-жыллыкъ спортчуланы араларында Россейни биринчилиги бардырылгъанды, анда хорлагъанлагъа дунияны биринчилигинде сермеширге онг берилгенди. Анга къыралны 52 регионундан 1500-ден аслам адам къатышхандыла. Къабарты-Малкъарны командасы каратени эки бёлюмюнде – толу контакт эм къорууланыу амалла бла толу контакт – эришгенди.

Грозныйде каратеден 12-13-жыллыкъ спортчуланы араларында СКФО-ну биринчилиги бардырылгъанды. Анда хорлагъанлагъа Россейни биринчилигинде эриширге онг берилгенди.