Министр Терк районда болгъанды

Кёп болмай КъМР-ни Жарыкъландырыу эм илму министри Анзор Езаов «Къабарты-Малкъарда школ системаны жангыртыу» регион проектни чеклеринде бардырылгъан ишле бла шагъырейленирча  Терк районда бир къауум школну жокълагъанды,- деп билдириледи ведомствону пресс-службасындан.    

Анзор Клишбиевич Терк районну  администрациясыны башчысыны къуллугъун толтургъан Асланби Хуштов бла  бирге   Урожайное, Терское, Хамидие, Тёбен-Курп, Огъары-Акъбаш элледе тынгылы ремонт ишле  къалай баргъанларына къарагъанды. Ызы бла Терек шахарда 820 окъуучугъа жангы  мектепни къурулушуна да кёз жетдиргенди. 

Эм биринчи ведомствону башчысы этилген ишлени, материалланы игилигине эм тамамланнган жумушлагъа  эс бургъанды. Ремонт ишле болжалдан кеч къалмай эм тынгылы этилгенлерин да энчи чертирчады. Подряд организациялада киши  аман кёрюнюрге сюймейди.    
Ол санда Терское бла Урожайное элледе школла битерге кёп къалмагъанды. Алада тийишли жумушла 95 процентге тамамланнгандыла. 

Тёбен Курпда да  мектепни  башын  жабып, ток чыбыкъланы, суу, газ  быргъыланы эм жылытыучу системаны  да тартып бошай турадыла.   Хамидие элде да школну башында къанжалларын, терезелерин, эшиклерин  алышып,  ичин сюртюп кюрешедиле.  
Огъары-Акъбашда да школгъа 167 жангы терезе салгъандыла эм башын жабып башлагъандыла. Аны бла бирге ичинде къабыргъаларын эм полларын да сюртедиле. 

Министр ишлени кёплюгюн ангыласа да,   графикден кеч къалмазларын  белгилегенди. Бир-бир соруула уа  оператив халда  тамамланыргъа кереклерине эс бургъанды.   
- Бюгюнлюкде билим бериуде  эки магъаналы проект бардырылады – жангыртыу эм   къурулуш.  Комплекс халда тынгылы ремонт этилгенини  хайыры бла школ жангы излемлеге келиширча болады. Ол шарт окъуучугъа тынгылы билим алыргъа болушурукъду эм  болумун да  игилендирликди. Бютюнда эл школла жангы мардалагъа келиширча болгъанлары къууандырады,- деп къошханды Анзор Езаов.

Ахырында къуллукъчу  ишле тийишли халда  барырча  къаты контрольда тутарыгъын да эсге салгъанды.