Къуллугъун артыгъы бла хайырланып, тёрт миллион сом къоранч этгенди

Полициячыла газ бла жалчытыу службаны Зольск  районда абонент бёлюмюню алгъыннгы таматасы кесини къуллугъун артыгъы бла хайырланнганын тохташдыргъандыла. Тинтиулени КъМР-де МВД-ны экономика аманлыкълагъа эм коррупциягъа къажау бёлюмюню къуллукъчулары отлукъ-энергетика комплексде аманлыкъланы тохтатыу жумушланы чеклеринде бардыргъандыла.

Белгили болгъаныча, 2018 жылда бёлюмню башчысы, газ быргъылада тас болгъанын букъдурур мурат бла, ишчилерине адамлагъа тарихлени семиртип жазаргъа буюргъанды. Алай бла, къуллукъчуну терслик ишини хатасындан районда газ бла  хайырланнганлагъа 4,706 миллион сом артыкъ тёлерге тюшгенди.

Эр кишиге РФ-ни УК-сыны 201-чи статьясыны 1-чи кесегине кёре уголовный иш ачылгъанды (къуллугъун артыгъы бла хайырланыу). Быллай аманлыкъ этгенни эркинлиги тёрт жылгъа сыйырылыргъа боллукъду.