Жорукъланы сакъламагъанны багъасы - адамны жашауу

Урван районну сюдю водительге ачылгъан уголовный ишни тинтип бошагъанды.  Эр кишини хатасындан жолда аварияда тёрт адам жоюлгъанды.  Сюд ачыкълагъаныча,  урванчы эр киши былтыр 8 сентябрьде «Рендж Ровер» машинада эркин этилген мардадан терк барып, «ВАЗ-21093» бла къагъышханды. Ол а алайдан чартлап, «ГАЗ-3102» машинагъа тийгенди. 

 Бу жарсыулу болумда ВАЗ-да келген водитель эм юч адам ауур жарала алып, алайда ауушхандыла, «Волганы» водителине уа саулугъуна ауур заран этилгенди. 

«Рендж Роверде» келген эр кишиге РФ-ни Уголовный кодексини 264-чю статьясыны 5-чи кесегине кёре материалла жарашдырылгъандыла. Ол жолда жюрюуню жорукъларын бузгъаныны хатасындан, билмегенлей, эки эм андан да кёп адамны ёлтюргени, башханы саулугъуна заран салгъаны ючюн  терсленеди. Урванчы этген аманлыгъына женгдиргенди. Прокуратура да уголовный ишни эмда сюдню оноуун къабыл кёргенди. 

Алай бла Урван районну сюдю, битеу шартланы тинтгенден сора, эр кишини эркинлигин 4 жылгъа бла 8 айгъа сыйырыргъа деген оноуну чыгъаргъанды. Дагъыда анга машинаны юч жылны ичинде жюрютюрге чек салыннганды

Тикаланы Фатима хазырлагъанды.
Поделиться: