Кесими башха ишде кёралмайма

«Россети Северный Кавказ» - «Каббалкэнерго» биригиуню бийик квалификациялы специалисти, диспетчер бёлюмню таматасы Кулчаланы Хасан энергетика бёлюмге кеси да сунмай тургъанлай тюшгенин букъдурмайды...

Ол Москваны къырал университетини тарых бёлюмюн бошагъандан сора тюрлю-тюрлю жерледе ишлегенди. Болсада 2003 жылда аны къадары энергетика бла байламлы этерге тийишли кёргенди. Артда, бу жаны бла билимин ёсдюрюрге кереклисин ангылап, Къабарты-Малкъар къырал эл мюлк академияны предприятияланы энергия бла жалчытыуну бёлюмюн бошагъанды. Андан бери жыйырма жылны энергетикада уруннганлай келеди эм аны айныууна уллу къыйын салгъанладан бириди.

– Сайлауума бек ыразыма. Бусагъатда кесими башха усталыкъ бла байламлы кёрмейме,- дейди Хасан Аллахбердиевич.

Кюн сайын Кулча улу абонентле келишимни бузмазларына, электрокюч ючюн хакъны заманында тёлерлерине, план бла белгиленнген эм башха ишле толтурурларына къайгъырады.

Хасан урунуу жолун контролёрдан башлагъанды, алай къысха заманны ичинде фахмулу жаш, кесин иги специалистча кёргюзтюп, 2006 жылда Чегемни район электросетьлерини таматасыны орунбасарыны къуллугъун толтуруп башлагъанды. Ызы бла Нальчикде «Каббалкэнерго» биригиуню диспетчер бёлюмюню таматасына кёчгенди. Мында да аны иш кёллюлюгю, усталыгъы эм адамлыкъ жаны бла энчиликлери да эсленмей къалмагъандыла. Биринчи кюнледен окъуна ол коллективден ыспас табалгъанды.

- Хасан Аллахбердиевич, ишин билген, компания ёхтемленнген кючлю специалистледен бириди. Ол билимин, сынамын да бирсилеге берирге кюрешеди. Иши къыйын болгъанына да къарамай, борчун тынгылы толтурады. Не заманда да жарыкъ кёллюлюгюн, сабырлыгъын тас этмейди, - деп къошхандыла коллегалары да.

Ишинде ахшы жетишимлери ючюн Кульчаланы Хасан «Россети Северный Кавказ» биригиуню айырмалы ишчилерини къангасында жерин тапханды.

Гитче замандан окъуна жигитибиз тирилиги бла айырмалы болгъанды, боксдан спортну устасыды, кёп кере тюрлю-тюрлю даражалы эришиуледе хорлагъанды. Иги кесек жылны футболдан «Каббалкэнерго» биригиуню командасында ойнагъанды. Бюгюнлюкде да спорт бла кюрешгенин къоймагъанды. Алай арт заманда бегирекда орус бильярдны жаратханын айтады. Тюрк бла арап тиллени да биледи, алада окъугъан, жазгъан да этеди.

Хасан юй бийчеси Малкъарланы Алла бла жаш бла къыз ёсдюредиле.