Сабанланы буздан къорууларгъа – 25 миллион сом

12 мая, 2022 - 09:47

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 25 миллион сом бёлюнюрюкдю. Аны юсюнден бизге  Эл мюлк министерствону пресс-службасындан билдиргендиле.    

Бюгюнлюкде Къабарты-Малкъарда буз булутланы чачхан  33 энчи пункт ишлейди.  Ала  бла  къорууланнган жерле 481,4  минг гектаргъа жетедиле. Тийишли ишлени бардырырча   КъМР-ни Эл мюлк министерствосу  Шимал Кавказны аскер  службасы бла келишим этгенди. Тийишли  жумушлагъа  жыл сайын регионну бюджетинден ахча бёлюнеди.

Республикада буз урургъа къоркъуулу заманнга жаз башы бла жай саналадыла. Ол себепден,  биринчи апрельден башлап, пунктланы  барысында да дежурство бардырылады.

Белгилисича, Къабарты-Малкъар буз уруп уллу халеклик салыргъа боллукъ  къоркъуулу регионладан бирине  саналады. Болсада энди жангы мадарланы хайыры бла эл мюлк жерлени  табийгъатны кючюнден сакъларгъа  онг табыллыкъды.

 

 

Бизни корр.
  • 22 просмотра
Поделиться: