Къабарты-Малкъарда ишленирик поликлиниканы мурдоруна бетонну биринчи кубу къуюлгъанды

Тюнене Нальчикде Къабарты-Малкъарны эм уллу поликлиникасы боллукъ мекямны мурдоруна бетонну биринчи кубун къуюу жарыкъ жумуш бардырылгъанды. Жангы мекям 1-чи номерли шахар клиниканы тийресинде ишленирикди.

Объект былтыр федерал адрес инвестиция программагъа къошулгъанды, проект биринчи звенону игилендириу программагъа кёре бардырылады. КъМР-ни Башчысы Казбек Коков жыйылыуну чегинде аяулу технологияланы сингдириуню, диагностика бёлюмлени проектированияларыны юсюнден айтханды.

КъМР-ни саулукъ сакълау министри Рустам Калибатов поликлиника «аяулу технологияланы» жорукъларына тийишли боллугъуна ышандыргъанды. Алып айтханда, саусузланы келиу къауумлары энчиленирикдиле, ОРВИ ышанлары болгъанла бирсиле бла тюбеширик тюйюлдюле мында. Мекямда регистратура, терапевт бёлюм, терк болушлукъ тапдыргъан служба, энчи медицина специалистлени отоулары, медицина профилактиканы бёлюмю, медик студентлеге окъутуу классла, процедура эм прививка отоула, къарау бардыргъан жерле, кюндюзгю стационар, административ-мюлк бёлюмле орналлыкъдыла. Жангы поликлиника уллу амбулатор-диагностика ара боллукъду, анда нальчикчилеге эм республикада жашагъанланы барына да консультацияла эм медицина болушлукъ тапдырыллыкъды, аланы саулукъларын тинтирикдиле, деп ангылатханды Рустам Калибатов.

Жангы поликлиниканы мурдорунда багъыу-диагностика бёлюм орнатыллыкъды, ол санда шахарны амбулатор бёлюмлерини барысына да ара лаборатория, медицина реабилитация, онкология амбулатор болушлукъ арала, эндоскопия, лучевой диагностика бёлюмле, компьютер эм магнит-резонанс томографияны, амбулатор реабилитацияны, жюрек-тамыр тинтиу онглары болгъан функционал диагностиканы кабинетлери. Жангы медицина махкемени мурдорунда стационаргъа жатдырыуну излемеген хирургия эм эндоскопия операцияла этилликдиле.

КъМР-ни къурулуш эм ЖКХ министри Алим Бербеков айтханнга кёре, сменнге 500 саусузгъа къарарча кючю эм уллулугъу 8 минг квадрат метрден уллу болгъан поликлиниканы къурулушу 2023 жылда декабрьде ахырына жетерикди.

Жангы поликлиниканы къурулушун башларча оноу республиканы таматасыны башламчылыгъы болгъанды, Россейни Президенти Владимир Путинни буйрукъларыны чеклеринде РФ-ни Правительствосуну эм РФ-ни Саулукъ сакълау министерствосуну себепликлери бла. Саулукъ сакълауну биринчи звеносун игилендириуню Президент баш ызладан бирине санагъанды, аны магъанасы – медицина болушлукъну эркин тапдырыуну жалчытыу.

КъМР-ни Башчысы Казбек Коков къурулушчулагъа жетишимли ишлеуню тежегенди. Тюбешиуню эсеплерине кёре республиканы оноучусу кесини телеграм-каналында былай белгилегенди: «Бу объект ишлене тургъанда, аны жалчытыугъа, медиклени билимлерин ёсдюрюуге, ол санда поликлиниканы аяулу технологияла жорукъланы низамында ишлеуюне энчи эс бургъанлай турлукъбуз. Жангы шёндюгюлю излемлеге келишген поликлиника республикада саулай саулукъ сакълауну биринчи звеносунда медицина болушлукъну тири айныууна эм ёсюуюне ахшы себеплик этеригине ийнанама».

Къууанчлы жыйылыугъа КъМР-ни Правительствосуну Председатели Мусукланы Алий, КъМР-ни Правительствосуну Председателини орунбасары Марат Хубиев, Нальчик шахар округну жер-жерли администрациясыны таматасы Таймураз Ахохов къатышхандыла. 

Поделиться: