Солуу кезиуде ишге чыкъ деген эселе…

Солуу неда байрам кюнледе иш бериучюле инсаннга къуллугъун толтурургъа буюрургъа эркинмидиле? Бу статьяда аны ангылатыргъа сюебиз.

Урунуу законлада «ишлемеген байрам кюн» деген ангылам жокъду. Болсада аллай кюнлени тизмеси уа РФ-ни Урунуу кодексини 112-чи статьясында шарт тохташдырылгъандыла. Анга, сёзге, жангы жылгъы каникулла бла Рождество  киредиле: 1-8-чи январь. Неда 23-чю февральда, 8-чи мартда,  байрамла болгъанлары ючюн, солугъан этебиз. Къууанчла шабат неда ыйых кюнлеге  тюшселе уа, солуу аны ызындан келген ишчи кюннге кёчюрюледи. 

Законлагъа тийишлиликде, солуу эм байрам кюнледе ишге чакъырыр ючюн энчи сылтаула болургъа керекдиле. Ич бериучю  инсаннга къуллугъун толтурургъа буйрукъну жазады, ишчи уа анга ыразылыгъын билдирирге тийишлиди. Байрамда ишлегеннге артда артыкъ солуу кюн бериледи неда хакъ экиге кереленип тёленеди.

Ишчилени бир-бир къауумларына, ол санда асламлы информация органлада уруннганлагъа,   производствону тохтатыргъа жарамагъан организацияланы, энчи эм къоруулау службаланы келечилери бла солуу эм байрам кюнледе къалай ишлегенлерини низамы урунуу келишимде белгиленеди. Сакъатла, юч жылы толмагъан сабийни анасы, 14 жылгъа дери сабийни кеси ёсдюрген ата солуу кюнледе  ишге, аланы саулукъларына заран салынмаса, чакъырылыргъа боллукъдула. Алай ала унамазгъа эркиндиле.

Хакъ къалай тёленеди?

РФ-ни Урунуу кодексини 153-чю статьясында жазылгъаныча, солуу кюнде ишлеген инсаннга хакъ  экиге кереленип тёленеди.  Неда къошакъ солуу кюн берилирге да боллукъду. Аны ишчи кеси сайлайды. Къаллай компенсация сюйгенинги юсюнден иш бериучюге белгили этилирге керекди, ансыз ыйыкъны ортасында чыкъмай къалгъанынг борчларынгы толтуруудан къачханнга  саналыргъа боллукъду.

Эркинликлеригиз бузулгъан эселе, урунуу инспекциягъа тарыгъыргъа онг барды. Аны уа онлайнинспекция.рф деген адресге электрон халда жазаргъа да боллукъду. Дагъыда праволарыгъыз  сакъламагъанларыны юсюнден  прокуратурагъа неда сюдге билдирирге да эркинлик барды.