Суратла – озгъан заманланы шагъатлары

                    Уллу Хорламны 77-жыллыгъына

Эрттегили суратла кёп сейирлик шартланы юслеринден  хапарлайдыла, талай жыл мындан алгъа  болгъан затланы  эсге саладыла. Ма бу сурат да аладан бириди. Аны юсюнден хапарны  Сергей Волков айтады. Манга уа аны  Санкт-Петербургда жашагъан бир иги танышым жибергенди.

«Бу суратда барысындан да гитче Борисчикни немислиле  жаулукъ бла асхан эдиле. Насыпха, аны жууукълары, терк жетип,  ёлюмден къутхаргъандыла. Уруш бошалгъандан сора  ол, ишчи усталыкъ алып, радиогъа чыракъла чыгъаргъан заводда ишлеп тургъанды.

Аны тамата къарындашын бла эгечин  да немислиле Германиягъа сюрюп кетген эдиле. Алай ала ары жетгинчи,  къачып къутулгъандыла. Артда  Къызыл Аскерни частьларындан бирине къошулгъандыла. Валентин агъач уста болгъанды, Зоя уа  медсестраланы курсларын бошап,  Гагарин шахарда сабийлеге бакъгъан больницада ишлерге киргенди. Анда ол бир гитче жашчыкъны ёлюмден къутхаргъанды, ол а  ма бу тизгинлени жаза тургъан адамды.  Шинтикде олтуруп тургъан бу жашчыгъ а  1961 жылны 12 апрелинде: «Поехали!» деген сёзню айтханды».

 Бу тизгинлени  жюрегинг къозгъалмай окъур амал жокъду. Бу къысха билдириучюк бюгюннгю кюннге да бек келишеди, бюгюнлюкде да россейлилени жангы тёлюсю фашизмге бла нацизмге къажау къаты сюелгенди.

                                                    

Холаланы Марзият.
Поделиться: