Борчну юсюнден электрон амал бла билирге онг барды

«Борчларынгы ёлчемин бил. Эркинликлеринги бил» битеуроссей акция тёрелиге аланнганды. Аны чеклеринде кёп функциялы аралада эмда Сюд приставланы федерал службасыны бёлюмлеринде инсанла борчларыны, ахчаны тёлеуню, божалланы созууну юслеринден эм кёп башха соруулагъа жууапла аладыла. Кезиулю акция бу кюнледе бардырылгъанды.

Аны аллында уа РФ-ни ФСПП-сыны КъМР-де Управлениясыны башчысыны орунбасары Олег Эфендиев журналистле бла тюбешип, аланы сорууларына жууапла бергенди.

Олег Аркадьевични билдиргенине кёре, май байрамланы аллында борчланы юслеринден шартланы билип, аланы тёлеу бютюнда магъаналыды. Бу кезиуде адамла тыш къыраллагъа солургъа барыучудула, алай  борчу болгъанны уа аллай эркинлиги сыйырылады.

Управленияны официальный сайтында   «Борчланы бил» деген бёлюм  къуралгъанды  «Анда аны ёлчемини юсюнден шартланы ачыкълагъан бла бирге,  ахчаны тёлерге да онг барды.  Бу кезиуде уа къоркъуусузлукъну сакълаугъа баш магъана бериледи: белгисиз сайтлагъа кёчмейсиз, аманлыкъчыла   сизни шартларыгъызны билалякъ тюйюлдюле. Дагъыда борчланы юслеринден Госуслуги порталда билирге да боллукъду»,-дегенди ол.

Ведомствону башчысыны орунбасарыны айтханына кёре, УФСПП документлени электрон амал бла ашырыугъа кёчеди. Госуслуги порталда эсепге тургъан адамгъа борчларыны юсюнден билдириуле жибериледиле.

Бюгюнлюкде службаны электрон сервислери бла хайырланнганланы саны ёсгенлей баргъанын чертгенди.  Ол санда инсанла ведомствону къуллукъчулары бла тюбешиулеге да он-лайн халда жазылыргъа боллукъдула. «Ахыр юч айны ичинде бу амал бла жюзден аслам адам хайырланнганды»,-дегенди Олег Эфендиев.

Сёз законлада жангычылыкъланы юслеринден да баргъанды. Федерал излемлеге тийишлиликде, инсанны борчун алгъан кезиуде, аны банк картасында  жашау этерге жетерик ахчаны эм аз ёлчемине тиерге жарамайды. Бу низам быйыл февральдан ишлейди. Аны бла хайырланыр ючюн а сюд приставлагъа келип, заявление жазаргъа тийишлиди. Олег Эфендиевни айтханына кёре, бу жорукъ ишлеп башлагъан кезиуден бери аны бла 1,5 мингден аслам адам хайырланнганды.

- Инсан къыйын жашау болумгъа тюшсе,  саулугъу осалгъа кетгенде,  башха сылтаула бла къолайлыгъы аман  болгъанда, аны да сюд приставлагъа билдирирге керекди. Бу кезиуде да борчну тёлеуню болжалы созулургъа боллукъду,-деп къошханды ол.

Сюд приставланы федерал службасы социал жаны бла къорууланмагъан инсанлагъа болушлукъ этгенин чертгенди Олег Аркадьевич. Сакъатлагъа, пенсиячылагъа, башха къауумлагъа толтуруу бегимле ачылгъан кезиуде кредит организациялагъа аланы болжалларын кенгертиуню юсюнден тилекле этиледиле. Бу къауумлагъа уа РФ-ни Сауутланнга Кючлерини къауумунда къаугъалагъа, энчи операциялагъа къатышханла да  киредиле.  Ол федерал законлагъа тийишлиликде, къаугъаланы ветеранларына тенг этилгенлери, алагъа льготала тохташдырылгъанлары бла байламлыды. 

Соруулагъа жууаплай, Олег Эфендиев бюгюнлюкге УФСПП-да 650 минг толтуруу бегим  болгъанын, аланы битеулю борчу 34 миллиард сомгъа жетгенин билдиргенди. Бегимлени 40 проценти жолда жюрюуню жорукъларына бузукълукъла этгенлеге чыгъарылгъандыла. Аны бла бирге банкрот предприятияланы бла организацияланы борчлары да асламдыла. Аслам эс алиментлени тёлетиуге бурулады. Бюгюнлюкде сабийлерине борчлары 3 минг инсанны барды.

 Сёзюню ахырында Олег Аркадьевич сюд приставла бла байламлыкъла жюрютюрге,  ангылашынмагъан шартланы юслеринден билдирирге, сорургъа чакъыргъанды. «Электрон амал бла хайырланыгъыз. Ала заманны аяргъа онг бередиле. Бизни сайтда «Толтурулгъан бегимлени тизмеси» бёлюмде, дагъыда Госуслуги порталда битеу шартла басмаланыпдыла»,-дегенди ол.