Табийгъатны юсюнден эсде къалырча дерсле

Хасанияны Фрийланы Рамазанны атын жюрютген 16-чы номерли мектепни  абадан классларында  табийгъатны сакълаугъа жораланнган «класс сагъатла» бардырылгъандыла. Ала мектепни ичинде, андан тышында да ётгендиле. Школчула  тёгерекде къудуретге къарагъандыла, устазлары алагъа  жерни, сууну, битимлени,  жаныуарланы юслеринден хапар айтхандыла.  Ботталаны Светлана   бла Хапаланы Мадина  «класс сагъатла»  эсде къалырча кёп тюрлю  амалланы хайырланнгандыла:  документли фильмле кёргюзтгендиле,  табийгъатны къоруулауну  юлгюлерин келтиргендиле, плакатла жарашдыргъандыла.

Светлана Идрисовна уа  энчи доклад да этгенди. Анда   табийгъатны нек сакъларгъа керекди, деген соруугъа жууап берирге кюрешгенди. Агъачда бир гитче терекчикни  сындырыу, кир-кипчикни атып кетиу табийгъатха  къаллай уллу заран келтиргенин, шёндюгю технологияланы къудуретге тийирген хаталарын ангылатханды.

-Табийгъат бизге жашау этерге кёп онгла береди,  алай андан къуруда  алып турмай, къайтара да билирге керекди… Жер –  бизни жангыз юйюбюздю, аны уа барыбыз да багъаларгъа, сюерге борчлуз,-  деп, устаз сабийлени: «Келигиз юйюбюзге заран салмайыкъ»,- деп чакъыргъанды.

«Класс сагъатлагъа» школчула да  табийгъатны юсюнден хапарла, сочиненияла хазырлагъандыла.