Ахча законсуз тюшген эсе, къыралгъа сыйырыллыкъды

Бу кюнледе битеу власть органланы къуллукъчулары былтыр алгъан файдаларыны бла къоранчларыны юслеринден шартланы ачыкъ этгендиле. Декларацияла ведомстволаны сайтларында басмаланыпдыла, хар инсан да аланы кёрюрге, тинтирге эркинди.

Болсада къуллукъчула барысы да бу низамгъа ыразы тюйюлдюле, законсуз ишлеген мюлклерин букъдурургъа кюрешгенле аз тюйюлдюле.   КъМР-ни прокуратурасындан бизге ангылатханларыча, бу кюнледе аллай хыйлачылагъа къажау закон къабыл кёрюлгенди. Анга тийишлиликде, къуллукъчу файданы законланы чеклеринде ишлегенин баям эталмаса, ырысхы къыралны иелигине берилликди.

КъМР-ни прокуроруну  тамата болушлукъчусу Сотталаны Жаннаны бизге айтханына кёре, ол жаны бла тюрлениуле «Банкланы эм банк ишни юсюнден» эмда «Коррупциягъа къажау ишни юсюнден» федерал законлагъа кийирилгендиле.

Алагъа кёре, къуллукъчу жылны ичинде алгъан файданы, мюлкню юслеринден шартла тинтилген кезиуде, аны кесини, юйдегисини, сабийлерини банк карталарына, башха кредит организациялагъа эсепле белгили этилген кезиуде эмда аны аллында эки жылны ичинде юйюр алгъан файдадан артыкъ ахча тюшгени ачыкъланса,  ол къайдан келгенин, аны законланы чеклеринде алгъанын шарт белгили этерге борчлуду. Ол файдасыны законлугъун жакълаялмаса, ахчаны къыралны иелигине ётдюрюрге эркинлик барды,-деп ангылатады Жанна Таукановна.

Бу жаны бла шартла  прокурор тинтиуле бардырылып сюзюллюкдюле.  Законда белгиленнгенича, надзор органны кредит организациялагъа, налог органлагъа, жеринден тепдирилмеген мюлкню эсепге салыугъа жууаплы ведомстволагъа, цифралы финанс операцияла бардыргъан операторлагъа      эсгертиуле берирге эркинликлери барды.                  

Алгъын а файдаларыны законлугъун ачыкълаялмагъан инсандан къыралны иелигине жаланда жеринден тепдирилмеген ырысхыны, траспортну, багъалы къагъытланы ётдюрюрге жарагъанды.

Прокуратура сюдге дау берип, къыралны иелигине алыргъа эркин этилген ахчаны эм аз ёлчеми 10 минг сомда тохташдырылгъанды. Коррупциягъа къажай мадарланы къатыландырыу жаны бла закон кючюне быйыл 17 мартда киргенди.