Ана тилни билгенлери бла къууандыргъандыла

«Ана тилим - жаным-тиним» деген республикалы конкурсну чеклеринде 5-чи - 10-чу класслада окъугъанланы арасында Къабарты-Малкъарны жазыучуларыны чыгъармаларындан юзюкле окъууда айырмалыланы сайлау жаны бла эришиуле бардырылгъандыла.

Республиканы жер-жерлеринден сабийле устазлары бла келип, усталыкъларын кёргюзтгендиле. Кимни чыгъармасындан къайсы юзюкню окъургъа сюйгенлерин а сабийле кеслери сайлагъандыла. Кёбюсю Шауаланы Хасанны, Созайланы Ахматны, Толгъурланы Зейтунну, Токумаланы Жагъафарны, Гулаланы Баширни, Гуртуланы Элдарны чыгъармаларын айыргъандыла.

Конкурсха къатышханлагъа актёрла, устазла, журналистле да багъа бичгендиле. Мен да жюрини къауумунда болуп, сабийлени фахмулулукъларына къууанып, алагъа тынгылай, зауукълукъ тапханма. Малкъар театрны актёру Шауаланы Орусбий а: «Хазыр артистле ёсюп келедиле да!», - деп сейирге окъуна къалгъанды. Сабийле чыгъармаланы кёлден окъуп къоймай, рольгъа келишип, аны сахна оюнча уста кёргюзтгендиле. Дагъыда бизни къууандыргъан бир шарт: ана тилибизде школчуланы ариу сёлешгенлери. Унутула барады тилибиз, сабийле сёлешмейдиле тауча, деп тургъан жарсыуубузну чачхандыла.

Алайды да, жюриге сайлау этерге къыйын болгъанды. Кёп даулашхандан сора 5-7-чи класслада окъугъанланы арасында биринчи жерни Тёбен Чегемден  Жанкишиланы Нателлагъа берирге тийишли кёргенди. Экинчи жерге Бызынгыдан Чочайланы Амина бла Бабугентден Бёзюланы Аида чыкъгъандыла. Тырныаууз шахардан Жашууланы Алан бла Шалушка элден Энейланы Ясмина ючюнчюле болгъандыла.

Тамата классланы окъуучуларыны арасында уа алгъа Элбрус посёлканы школуну окъуучусу Уяналаны Амина чыкъгъанды, экинчи жерге Яникой элден Мишаланы Аиша бла Жангы Малкъардан Байсолтанланы Ислам тийишли кёрюлгендиле. Ючюнчю жерни Хушто-Сыртдан Жансуйланы Магомет алгъанды.

Ала юч минутну ичинде кеслерини фахмуларын ачыкълагъандыла. Кеслери да миллет кийимле кийип, халкъыбызны ол шартына да эс бурдургъандыла. Сёз ючюн, Бызынгыдан Чочайланы Аминаны жыйрыгъы эмда къол бла сырылгъан эрттегили жаулугъу къарагъан кёзге бек хычыуун кёрюне эди.

Ахырында конкурсха къатышханлагъа дипломла, сертификатла эм саугъала берилгендиле. КъМР-ни жарыкъландырыу, илму эмда жаш тёлюню ишлери жаны бла министри Анзор Езаов а ол башчылыкъ этген ведомствону ишчиси, конкурсну къурагъан эмда бардыргъан Ахайланы Ларисагъа, ишчи къауумгъа да жюрек ыразылыгъын билдиргенди. Министр дагъыда жюрини махтагъанды. «Быллай фахмулу сабийлеге багъа бичген къыйынды, болсада ол жумушну шарайыпсыз толтургъансыз», - дегенди ол.

Мен да Лариса Рамазановнагъа ыспас этерге сюеме. Ол КъМР-ни Жарыкъландырыу, илму эмда жаш тёлюню ишлери жаны бла министерствосунда бет жарыкълы уруннганлы талай жыл болады. Устазла бла дайым байламлыкъ жюрютеди, алагъа къолундан келгенича болушханлай турады. Аны хайырындан бизни устазларыбыз, окъуучуларыбыз да къуру республикабызда угъай, башха регионлада бла шахарлада, ол санда Москвада да, бардырылгъан конкурслада алчы жерлени аладыла. Республиканы устазлары ол затлары ючюн Ларисагъа жюрек ыразылыкъларын билдиредиле.

Дагъыда Бызынгыдан устаз Чочайланы Нажабатны юсюнден да айтмай болалмайма. Ол не тюрлю миллет жумушха да кёлюн салып къатышады. Узакълыкъгъа къарамай, Бызынгы элни школуну сабийлерин не жыйылыугъа да алып келеди. Алчы жерсиз да къалмайдыла.