Школчу жолда тутулгъанды

Черек районда акъылбалыкъ болмагъанланы ишлери жаны бла комиссияны кезиулю жыйылыуунда  жаш адамгъа ачылгъан административ иш сюзюлгенди. Бу жаны бла кенгешлеге уа районну прокуратурасы дайым да къатышады. Надзор ведомстводан бизге билдиргенлерича,   прокурорла акъылбалыкъ болмагъанланы эм аланы ата-аналарын жууапха тартыу жаны бла ишлени дайым да контрольда  тутадыла.

Бу жол а школладан бирини окъуучусу машинаны жюрютюрге праволары болмай тутулгъанды  жолда.  Къыралавтоинспекторла анга РФ-ни КоАП-ыны 12.7-чи  статьясыны 1-чи кесегине кёре  административ бегим жарашдыргъандыла.

Комиссияны келечилери бу ишни болумун тинтип,  акъылбалыкъ болмагъаннга аманлыкъланы этерге жарамагъаныны юсюнден эсгертиу чыгъаргъандыла. Аны бла бирге   бу бузукълукъ  жаш адамны атасына бла анасына сабийлерин юйретиуде  борчларын тынгылы ангылаталмагъанларыны хатасындан этилгени да тохташдырылгъанды.    Аны бла байламлы Жемталаны орта школуну башчысына законлагъа бу бузукълукъланы эмда аны сылтауларын кетерирге кереклиси эсгертилгенди.