Гитче бизнесге болушлукъ этерге оноулашхандыла

РФ-ни Къырал Думасы биринчи окъууда КоАП-ха тюрлениуле кийириллигин дурус кёргенди. Сёз мында гитче бизнесге административ басымны азайтыуну юсюнден барады. Тийишли тюрлениулени Экономиканы айнытыу министерство бла «МСП Корпорация» эмда предпринимательле хазырлагъан эдиле. Алада гитче эмда орта предприятиялагъа себеплик этерик шарт эмда къыйматлы атламла бардыла. Шёндюгю экономикалы болумда алагъа ол бек керекди.

Сёз ючюн, тюрлениуледе предпринимательге «жангылыргъа эркинлик» бериледи. Башхача айтханда, ол бузукълукъну биринчи кере (кишиге да хата салмай) этсе, аны жууапха тартмай, алай этерге жарамагъанын ангылатып къоярыкъдыла. Дагъыда гитче эмда эм гитче предприятиялагъа салыныучу тазирни ёлчеми азайтыллыкъды, ол кеси да энчи предпринимательле тёлеучю тазирге тенг боллукъду.

Предприниматель терс болмай, аны ишчиси уа бузукълукъ этсе, биринчиси жууапха тартыллыкъ тюйюлдю.

Энтта да бир жорукъгъа тийишлиликде бир тинтиуню кезиуюнде ачыкъланнган талай бузукълукъну юсю бла аллай бир кере тазир салынырыкъ тюйюлдю. Башхача айтханда, «Бир тинтиу- бир тазир» деген амал хайырланыллыкъды.