Жашау халланы игилендириу жаны бла мадарла бардыла

Къыралда жашау журтла сатып алыргъа къырал себеплик программала ишлейдиле. Бу статьяда уа льготалы ипотека кимге берилгенин ангылатыргъа сюебиз. Ала санкцияланы кезиуюнде да ишлерикдиле.

 Узакъ востоклу ипотека

Бу программа бла къыралны битеу инсанлары хайырланыргъа боллукъдула, алай жашау журтну уа жаланда Узакъ Восток федерал округда сатып алыргъа эркин этилгенди. Ипотека жылгъа 2 процентге бериледи. Алай аны алыргъа сюйгенлеге излемле бардыла, ол санда жыл санларына.

Жашау журтну хазыр юйде алыргъа боллукъду. Программа 2024 жылны ахырына дери ишлейди.

Льготалы ставка

Аны ёлчеми кредит тёленип бошалгъынчы тюрлендирилмейди. Аны 2020 жылда 17 апрельден 2021 жылда 1 июльгъа дери 6,5 процентге бергендиле. Къалгъан ахчагъа  банклагъа къырал субсидияла бергенди. Бу программаны чеклеринде кеслерини жашау болумларын 2 миллион адам игилендиргендиле. Аны магъаналылыгъын эсге алып, 2022 жылда 1 июльгъа дери жашауда бардырыргъа оноу этилгенди. Ипотеканы ставкасы 7 процентге жетеди.

 Программа бла энчи жашау журт ишлетирге сюйгенле да хайырланыргъа эркиндиле.

Юйюр ипотека 

Бу программа да битеу къыралда ишлейди. Аны 2018 жылда 1 январьдан 2022 жылда 31 декабрьге дери кезиуде сабийле туугъан юйюрлеге  алыргъа жарарыкъды, ол санда саулукъларына кёре чекленнген онглары болгъанла.  Ипотека 30 жылгъа бериледи, аны ёлчеми да 6 процентди.

Ахчаны энчи жашау журт ишлетирге, жер сатып алыргъа къоратыргъа да жарайды. Алай мекямны келишим къабыл кёрюп, къурулуш компания неда энчи предприниматель ишлетирге керекди. Аны алыргъа сюйгенле уа кеслерини ахчаларын къошаргъа керекдиле. Биринчи тёлеу жерни (юйню ишлетиуню) багъасыны 15 проценти тенглиди.

Эл мюлк ипотека

Элде жашау журтну сатып алыргъа сюйгенлеге 3- процентлик льгота ипотека программа ишлейди. Аны биринчи тёлеую жашау журтну багъасыны 10 процентинден аз болмазгъа керекди. Программаны чеклеринде хазыр юйню сатыу-алыу келишим этип, неда ишлене тургъан журтда фатарны долевой мадар бла сатып алыргъа жарайды. Андан сора да, бу ахчагъа жер сатып алыргъа да эркин этиледи.

  Аскер ипотека

Бу программа 2005 жылда ишлеп башлагъанды. Аскер ипотеканы 20 жылгъа бередиле. Алай аны инсан 45 жылы толгъунчу тёлеп бошаргъа керекди. Аны жашауда бардырыугъа Росвоенипотека жууаплыды.

Башха льготалы программаланы «ДОМ.РФ» къырал компания тамамлайды. Аны сайтында битеу документле бла шагъырей болургъа онг барды.

 

Тикаланы Фатима хазырлагъанды.
Поделиться: