Экинчи кере да эсирип

Терк районну къырал автоинспекторлары кеф водительни ачыкълагъандыла.

Быйыл 11 мартда кече  экини жарымында Тамбовское элде полициячыла ВАЗ-211020» машинаны тохтатхандыла.  Аны водителинден аракъы ийис чыкъгъанын сезгендиле инспекторла. Медицина тинтиуле 32-жыллыкъ эр киши эсирип тургъанын ачыкълагъандыла. Право низамны сакълаучула ол алгъын да машинаны эсирип жюрютгени ючюн административ жууапха тартылгъанын тохташдыргъандыла.

Водительге алгъын кеф болуп машинаны жюрютгени ючюн административ жууапха тартылып, бу бузукълукъну къайтарып этгени ючюн уголовный иш ачылгъанды (РФ-ни УК-сыны 264.1-чи статьясыны 1-чи кесеги).

  Биягъы тутулгъанды   

Оператив-тинтиу жумушланы кезиуюнде РФ-ни МВД-сыны Чегем районда бёлюмюню полициячылары Экинчи Чегемден 38-жыллыкъ эр кишини тутхандыла. Ол алгъын сюдню оноуу бла бир ненча кере жууапха тартылгъанды. Бу жол а ол Москвада уручулукъ этерге кюрешгени ючюн федерал излеуге берилген эди.

 Ишге 50 адамны алгъанма деп алдагъанды

КъМР-де МВД-ны экономика къоркъуусузлукъ эм коррупциягъа къажай бёлюмюню полициячылары УФСБ-ны къуллукъчулары бла бирге оператив-излеу жумушла тамамлап, эл мюлкледен бирини башчысы субсидияланы хыйлачылыкъ этип алгъанын ачыкълагъандыла.

Эр киши предприятиягъа ишге  келгенлени билимлерин игилендириуге эм стажировкаларын бардырыугъа къоранчланы республикалы бюджетден артха къайтарыргъа боллугъун билип,  субсидия бла хайырланыргъа умут этгенди.

2018 жылда октябрь-декабрь кезиуде ол таматалыкъ этген организациягъа ишге 50 адамны алгъаныны, алагъа хакъ тёлегенини эмда окъутханыны юслеринден жалгъан документлени хазырлагъанды. Алагъа кёре уа предприятиягъа 2,9 миллион сом тёленнгенди.

Эр кишиге РФ-ни УК-сыны 159-чу статьясыны 4-чю кесегине (хыйлачылыкъ)  кёре терслеу материалла ачылгъандыла.

Билип, ётюрюк айтханды

 РФ-ни СК-сыны Нальчикде бёлюмюню къуллукъчулары РФ-ни УК-сыны 306-чы статьясыны 2-чи кесегине кёре ачылгъан уголовный ишни тинтип бошагъандыла. Тиширыу билип, ётюрюк айтып, башха адам ауур аманлыкъ этгенди деп терслегени ачыкъланнганды.

 Следствие тохташдыргъаныча, 2021 жылда 7 октябрьде нальчикчи тиширыу полициячылагъа тарыкъгъанды. Ол аны иш бериучюсю 2020 жылда январьда анга артыкълыкъ этгенди деп терслеп, жууапха тартырларын излегенди. Алай бла тиширыу иш бериучюсю аны къуллугъундан къыстагъаны ючюн дерт жетдирирге умут этгенди.

 Тинтиулени кезиуюнде следовательле тиширыу жалгъан билдириу этгенин тохташдыргъандыла. Аны бла байламлы анга РФ-ни УК-сыны 306-чы статьясыны 2-чи кесегине кёре уголовный иш ачылгъанды.

Ачыкъланнганыча, тиширыуну  психика жаны бла  аурууу болгъаны бла байламлы сабийликден да медицина учрежденияда эсепде тургъанды. Экспертиза тохташдыргъаныча, ол этген ишини ауурлугъун ангыламагъанды.

Материалла  тиширыуну багъыу жаны мадарла бардырылыр ючюн сюдню къараууна берилгендиле.